Arctic Umiaq Line siuariarpoq
Umiarsuaatileqatigiit pingasunngormat ileqquusumik ataatsimeersuarmata pisortap Jette Larsenip tamanna oqaatigaa, Arctic Umiaq Line-llu ingerlatsinermut aningaasartuutai 8,1 millionit koruuninik amigartoorfiunerat ilanngullugu oqaatigalugu.
Amigartoorutit Namminersorlutik Oqartussat matussuserpatigik, aningaasallu kaaviiaartitat 38 millionit koruunit ilanngunneqarpata naatsorsuutit 0-nngussapput. 12 millionit koruuninilli amigartoortoqarnissaa Namminersorlutik Oqartussat naatsorsuutigisimammassuk, aningaasat immikkoortinneqareersimapput, tassalu umiarsuaatileqatigiit naatsorsuutigisaaniit 4 millionit koruuninik amigartoorutit ikinnerullutik.
Umiarsuaatileqatigiilli sinneqartooruteqarlutik ingerlalernissaat suli ungasippoq.
- Umiarsuaatileqatigiiffipput sinneqartooruteqarluni ingerlasinnaanngilaq, tassami inuit umiarsuarmik angalaniartut amerlassusaat naammannginnami, AUL-imi pisortaq Jette Larsen taama oqarpoq.
Ukiunili tullerni tallimani suleriusissaq nutaaq naapertorlugu amigartoorutit sapinngisamik appasinnerpaatinniarneqartut, pisortap ilanngullugu oqaatigaa.
Umiarsuaatileqatigiiffik Air Greenlandimit Royal Arctic Line-millu pigineqarpoq.
