Arctic Umiaq Line matunngikkallarpoq

Naalakkersuisut ullumi ataatsimiiikkamik taama aalajangiipput.

- Arctic Umiaq Linep ingerlagallarnissaa aamma Assartuussineq pillugu isumalioqatigiissitap isumaliuuteqarnissaa, taanna aasamut piariissaaq, utaqqeqqaartariaqarparput. Tassami Arctic Umiaq Line ullumiklkut matugaluarpat allarpassuarnut kalluaasussaavoq.

Kuupik Kleist oqarpoq. Arctic Umiaq Linep angalanissamut pilersaarutai aasamut atuuttut Naalakkersuisut aalajangernerannit kalluarneqanngillat, tassalu aasaru angalanissamut pilersaarutit atuuttut malinneqannassapput.

Arctic Umiaq Line siorna katillugit 7,2 millioner koruuninik amigartooruteqarpoq.

Nunatta karsianiit Arctic Umiaq Linemut ukioq manna 2,5 millioni koruuninik aningaasaliisoqarpoq, taakkualu naammanngilluinnarsimapput.

Amigartoorujussuarneq tunngavigalugu piginnittaasa aappaat, Air Greenland marsip 15-ani nalunaarpoq, piginneqataassutini tuniniarlugit.

Taamatut nalunaarneq umiarsuaatilerqatigiiffiup, Sarfaq Ittummik ingerlatsisup, matunissaanik annilaangalersitsivoq.

Kisianni Naalakkersuisut siulittaasuat Kuupik Kleist oqarpoq, Arctic Umiaq Line matuneqarnissaaanik ullumi aalajangertoqaraluarpat, tamanna Air Greenlandip aammalu Mittarfeqarfiit ingelatsinerannut kalluaasussaasoq, taakkualu aamma tusarneqartariaqartut, soorlu aamma Inatsisartut tusarneqarumaartut.

- Inatsisartut oqaloqataanissaminnut periarfissinneqartussaapput aammalu angallassinermi suliaqartut allat peqataanissaat pigaaruteqarpoq.

Kuupik Kleist oqarpoq. Misissuinissarli qaqugu naammassissanersoq Kuupik Kleistip oqaatigisinnaangilaa.

Naalakkersuisut aalajangernerat Air Greenlandip umiarsuaatileqatigiiffimmi piginnittuuneranik allannguinermik kinguneqanngilaq. Piginneqataassutit allanngunngillat.

Tamannalu Air Greenlandip pisortaata, Michael Binzerip tusaatissatut tiguaa.

- Maanna assartuussineq pillugu isumalioqatigiissitat sulissapput, uagullu paasissutissanik tunniussuissaagut, pisortaq oqarpoq.