Arctic Primemi pilersaarutit allanngunngillat
Ingerlatseqatigiiffiit pingasut, Arctic Prime Production aalisakkerivinnik ingerlatsisoq, Arctic Prime Coastal, aalisariutinik mikinernik ingerlatsisoq, kiisalu Arctic Prime Fischeries kilisaatinik anginernik marlunnik ingerlataqartoq nutaamik pisortaqalerput. Illuatungeriit paaseqatigiiffigisaannik Kim Høegh Dam taarserlugu Marcus Jacobsen direktørinngorpoq.
- Pilersaarutaareersut ingerlaannassapput, pisortanngoqqammersoq Marcus Jacobsen oqarpoq.
Qaqortumi aalisakkerivik ingerlaannartussaavoq. Qaqortumi eqqaanilu aalisartut tulaattagaat ukiuunerani inunnut sisamanut suliassaqartitsipput, uernaakkumiit bundgarnersortoqaleraangat sulisut amerlanerulertarlutik.
Kuummiuni qalerallit aalisartut tulaattagaat amerlagisassaangikkaluartut aalisakkeriviup ingerlanneqarnissaanut naammapput.
Nanortalimmi aalisakkerivik ingerlaqqilissappat ningittagarsuutit avataasiorlutik aalisarsinnaasut marluk pisariaqartinneqassapput. Immikkut akuersissuteqartoqarneratigut avataani saarullittassanik minnerpaamik 1000 tonsinik pisassinneqarnissani aalisartitseqatigiiffiup massakkut sulissutigaa. Tamanna piviusunngussappat saarullinnik tarajortereqqilernissaq pilersaarutigineqarpoq.
