Arctic Circlemi sap. ak. naanerani Reykjavikimi ataatsimiittoqassaaq
Politikkikkut oqalliffik Arctic Circlemik taaguuteqarpoq nunarsuarmioqatigiillu aalajangiisartuinit, politikerinit, inuussutissarsiutinik ingerlataqartunit, nunap inuiisa sinniisuinit, NGO-nit avatangiisinik illersuiniaqatigiiffinnit ilisimatuunillu peqataaffigineqarluni.
Islandip præsidentia Ólafur Ragnar Grímsson oqalliffimmik pilersitsiniarmi siuttuuvoq, siulersuisunilu ilaatigut nunatsinni naalakkersuisut siulittaasorisimasaat Kuupik Kleist ilaasortaavoq.
Ataatsimeersuarneq Islandip præsidentianit ullumi ammarneqassaaq, oqalugiartussallu ilaatigut tassaapput naalakkersuisut siulittaasuat Aleqa Hammond, Savalimmiuni lagmandi Kaj Leo Holm Johannesen, senatori Alaskameersoq Lisa Murkowski kiisalu Canadap Ruslandillu issittumi aallartitaat.
Aammattaaq Amerikami nunanut allanut ministeriusimasoq Hillary Clinton, avatangiisinik illersuiniartoq Al Gore, ataatsimeersuarnermi ataasinngorpat tungaanut ingerlanneqartussami videokkut saqqummiisussaassapput.
Silap pissusiisa allangoriartornerisa Issittumi periarfissarpassuarnik ammaassinerisa ilutigisaanik Issittumik soqutigisallit kikkulluunniit peqataaffigisinnaasaannik oqallittafeqarnissaq pisariaqartinneqarpoq. Tamannalu politikkimut, niuernermut ilisimatusarnermullu atuuppoq, Kuupik Kleist Sermitsiamut ullumi saqqummersumut oqarpoq.
Oqallittarfittaap Issittumi Siunnersuisoqatigiinnut unammillertaannginnera erseqqissaatigaa, Issittumili Siunnersuisoqatigiinnut, issittumi naalagaaffiit naalakkersuisutigoortumik suliniaqatigiiffigisaannut, tapertaasussatut oqaatigalugu.
Ataatsimeersuarnerup ulluisa kingullersaanni Nunarput immikkut sammineqartussaavoq. KNAPK-p, Ilisimatusarfiup, Royal Greenlandip, RAL-ip Issittumilu Sakkutooqarfiup Kalaallit Nunaata Issittumi periarfissai pillugit saqqummiissallutik.
