Pilersaarut nutaaq: Qeqqata Kommuniata takornariaqarlualernissaa naatsorsuutigaa

Qeqqeta Kommuniata takornariaqarnerup ineriartortinneqarnissaa pillugu nalunaarusiaq ullumi saqqummersippaa nalunaarusiaq professorip Minik Rosingip taaguusersimavaa Arctic Circle Road tassa kiffaanngissusermut aqqut.
Assi © : Qeqqata Kommunia
Allattoq Karsten Sommer
maajip 10-at 2019 10:00
Nutserisoq Bikki P. Kleist

Nalunaarusiami saqqummiunneqarpoq, takornarianut unnuisarfissannik namminersortunit aningaasaliisoqarnikkut, Arctic Circle Roadimik sanasoqarnissaa tassa Kangerlussuarmit Sisimiunut aqqusinniortoqarnissaa inuiaqatigiinni aningaasaqarnikkut imminut akilersinnaasoq.

Takornariaqarnerup annertusiartornerata inuit akileraarutaannik pisortanullu akileraarutinik annertuumik nassataqassammat, Arctic Circle Road pisortanit aningaasaliiffigineqartariaqaraluartoq, Qeqqata Kommiani borgmesteri, Malik Berthelsen tusagassiutinut nalunaarummi taama allaaserisaqarpoq.

Nunap immikkoortuani namminersorlutik ingerlatsisut Arctic Circle Road sananeqarpat akunnittarfinni, unnuisarfinni illuaqqanilu takornarianut siniffissanik 838-nik pilersitsiniarput, taakkualu Sisimiuni, aqqusinermi pingaartumillu Kangerlussuarmi pilersinneqassasut pilersaarummi saqqummiunneqarpoq.

Destination Arctic Circle ukioq kaajallallugu takornariaqarnermik sulissisarpoq, ilaatigut soorlu ukiumi qimussertitsisoqartarpoq, qamuteralattoqartarpoq sisorartoqarsinnaasarluni, aasaaneranilu angalaartoqartarpoq aalisariartitsisoqartarlunilu.

- Nunatta sinneranut qanimut suleqatigiinnissamut qilanaarpugut, pingaartumillu Ilulissani Nuummilu mittarfissanut nutaanut, borgmesteri oqarpoq.

Siunissami takornarianik kaajallaasitsisarnerit Kangerlussuarmit Arctic Circle Road aqqutigalugu Sisimiunut, naggataatigullu mittarfiit nutaat arlaannit timmisartorluni Kalaallit Nunaanni takornariaqarnerup qaffarujussuarneranik malitseqassaaq, borgmesteri oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk