Royal Arctic Linemi inuttaq coronavirusimik tunillatsissimasoq

Royal Arctic Linemi inuttat ilaat coronavirusimik tunillatsissimavoq.

Sulisoq Aalborgimiippoq, taannalu umiarsuarmit niusimalluni.

RAL-ip oqarnera naapertorlugu umiarsuaq nunatsinniissimanngilaq.

RAL-ip pisortaata tulliata, Aviâja Lyberth Lennertip oqarnera naapertorlugu umiarsuaq inuttallu sinneri Danmarkimiipput, inuttallu sinneri ullumi misissorneqassapput.

Taassumali inuttat qanoq amerlatigisut misissorneqassanersut paasissutissiissutigerusunngilaa.

Inuttat tamarmik umiarsuarmiiginnaqquneqarput.

AAMMA ATUARUK Nunatsinni misissuineq kingulleq tunillatsittunik naammattuuviffiunngitsoq

Pisortap tulliata oqarnera naapertorlugu Aalborgimi RAL-imi sulisut tunillatsissimasinnaanerannut aamma aarlerinartoqanngilaq.

Royal Arctic Linep Nakorsaaneqarfik Danmarkimilu peqqissutsimut oqartussat pisup qanoq iliuuseqarfiginissaa pillugu suleqatigai.

Pisortap tulliata oqarnera naapertorlugu malittarisassat malinneqarluarput, nunamilu sulisut umiarsuarmut ikeqqusaanngillat, taamatullu umiarsuarmi inuttat RAL-ip immikkoortiterivianiittut qanilleqqusaanagit.

Aviâja Lyberth Lennertip Danmarkip nunattalu akornanni umiarsuartigut nassiussanut tamanna sunniuteqarnavianngitsoq oqaatigaa.

- Nunatsinnut pilersuineq eqqugaanavianngilaq, aamma taamaattoqalernissaa naatsorsuutiginngilarput.