Aqutsisut inissiisarfimmi ulluinnaat pillugit: Sammiveqannginneq atussallugu annertuallaarpoq
Nuummi pinerluuteqarsimasunut inissiisarfimmi nutaami piviusut marlutut assigiinngitsutut ipput.
KNR-ip pinerluuteqarsimasunut inissiisarfimmut inissinneqarsimasut, sinniisoq uippakajaarneq pissutigalugu sulinngiffeqartoq Parnaarussiviillu kattuffiata allattaa sapaatini-akunnerni kingullerni oqaloqatigai.
Taakku tamarmik suliffimmi pissutsit, inissinneqarsimasunut ulluinnaat, nakkutilliisulluunniit – pingaartumik misilittagaqarluartut ilinniakkaminnik naammassinnissimasut nalinginnaasumik amigaataanerat isornartutut oqaatigaat.
Mikrofonili pinerluuteqarsimasunut inissiisarfimmi aqutsisunut saatsikkaanni inissiisarfimmi matoqqasumi ulluinnaat allarluinnartut isikkoqarput.
Nuummi pinerluuteqarsimasunut inissiisarfimmut inissinneqarsimasut ilaasa pissutsit naammagittaalliutigereeraallu inissiisarfiup nutaap oqallisigineqarnera annertunerulerpoq.
Sulisut amigarnerat susassaqartitsinerillu taamaatiinnarneqartut ajornartorsiutit ilaattut oqaatigineqarput.
Nuummi pineqaatissinneqarsimasunut inissiisarfimmi nakkutilliisut 49-sussatut naatsorsuunneqarpoq. Juunilli aallaqqaataani 31-nnaat sulisorineqarput, taakkunannga 15-it ilinniartuupput.
KNR-ip illuatungeriit qassiiusut pinerluuteqarsimasunut inissiisarfimmi pissutsit pillugit oqaloqatigai.
Peter Fomsgaard pinerluuteqarsimasunut inissiisarfimmi ulluni 14-ini aqutsisuuvoq. Taassuma pissutsit sammiveqanngitsut sulinermiluunniit pissutsit nakkutilliisunut sammiveqanngitsut sapaatini-akunnerni marlunni sulinermini nalaassimanngilai.
Ajornartorsiutit taakku isornartorsiuisut ilaasa pinerluuteqarsimasunut inissiisarfimmi nalinginnaasutut ilersimasutut oqaatigigaluarpaat.
- Maani (pinerluuteqarsimasunut inissiisarfimmi aaqq.) pissutsit ajunngilluinnartutut nassuiaatiginiarpakka. Kisianni soorunami nakkutilliisut misilittagaqartut qulit pisariaqartissinnaavagut, kisianni piviusoq maannakkut taamaanngilaq, Peter Fomsgaard KNR-imut oqarpoq.
AAMMA ATUARUK Nuummi pinerluuteqarsimasunut inissiisarfimmiittut inissiisarfimmi pissutsit pakatsissutigigaat
Tassumali pinerluuteqarsimasunut inissiisarfimmi sulilinngikkallarami pissutsit qanoq issimaneri ilisimanagit erseqqissaatigaa.
Tina Damilli Nuummi pinerluuteqarsimasunut inissiisarfimmi aqutsisuusimasup ilisimavai. Taanna inissiisarfiup 2019-imi juuni ammarneraniilli aqutsisuuvoq.
Sulisut amigarnerat inissiisarfimmullu nutaamut nuunneq sulisunut inissinneqarsimasunullu unammillernartoqartitsisimasoq oqaatigaa.
- Piffissaq sakkortusimavoq. Sulisut ataatsimiittarneranni oqaloqatigiissutigineratigut iliuuseqaqaagut. Sakkortunera aamma ajunnginnera oqaluuseraagut. Isumaqarpunga iluaqutaangaatsiartoq, Tina Dam oqarpoq, pinerluuteqarsimasunullu inissiisarfiup iluani pitsaasumik ineriartortoqarnerarlugu.
Unammillernartut iliuuseqarfigineqartut
Nunatsinni pinerluttunik isumaginnittoqarfiup pisortaata, Naaja Nathanielsenip Parnaarussiviit kattuffiata qassiiusunik isornartorsiuilluni nalunaaruteqarneranut atatillugu KNR oqaloqatiginikuuaa.
Parnaarussiviit kattuffiata allattaata René Larsenip pinerluuteqarsimasunut inissiisarfimmi nukittunerit aqutsinerat pissutsillu sammiveqanngitsut oqaatigai.
Tamatuma saniatigut inissinneqarsimasut marluk Danmarkimut Herstedvester Fængselimut nuunnissartik kissaatigaat. Kissaateqarneranngooq Nuummi pinerluuteqarsimasunut inissiisarfimmi pissutsinik ajornartorsiutaasunik pissuteqarpoq.
Peter Formsgaard
Naaja Nathanielsenip isornartorsiuinermi piviusoq qaangerneqarsoraa, aqutsisullu pinerluuteqarsimasunut inissiisarfimmi unammillissutaasimasunik isumaginnilluarsimasoralugit.
- Pissutsit (Nuummi pinerluttunik inissiisarfimmi aaqq.) sammiveqanngissinnaaneranik oqartoqarnera ilisariuminaatsippara. Misiliummik nakkuutilliisugut ukiorpassuarni sulinermi misilittagaqanngikkaluarlutik amerlasuut pikkorilluinnartuupput, Naaja Nathanielsen oqarpoq.
AAMMA ATUARUK Pinerluuteqarsimasunut inissiisarfiup sinniisua uippakajaarnini pissutigalugu sulinngiffeqartoq
Tassuma pinerluuteqarsimasunut inissiisarfimmi pissutsit pitsaanerpaamik pitsanngorsarneqartut erseqqissaatigaa. Ilaatigut nakkutilliisunik misilittagaqarluartunik Danmarkimit tikisitsineq, suliffiup aaqqissuussaanerani pitsanngorsaaneq suliamillu isumaginninnermik salliutitsineq pitsanngorsaatigineqarput.
Pinerluuteqarsimasunut inissiisarfiup 2019-imi juunimi ammaqqaarnerani inissiisarfimmi sulisussaaleqineq ajornartorsiutaasoq KNR-ip saqqummiunnikuuaa.
Nunatsinni pinerluuteqarsimasunik isumaginnittoqarfik naapertorlugu Nuummi pinerluuteqarsimasunut inissiisarfimmi 49-nik nakkutilliisoqartussaavoq. Nakkutilliisut juunip ulluisa aallaqqaataanni 31-upput, taakkunannga 15-it ilinniartuullutik.
Oqaaseq sammiveqannginneq annertoorujussuusoq
Naalli pinerluuteqarsimasunut inissiisarfimmi ilungersunarujussuanngitsutut oqaatigigaluarlugit Peter Fomsgaardip inissiisarfimmi nakkutilliisut ilinniarsimasut misilittagaqartullu amerlanerusut assigiinngisitsilluinnarsinnaagaluartut oqaatigaa.
Pinerluuteqarsimasunut inissiisarfimmi pissutsit nammiveqanngitsut imaluunniit sulisut akornanni uippakajaartoqarnera ajornartorsiutaasoq nalaassimanngiliuk?
- Tamanna maluginngilara. Sammiveqannginneq oqaaseq annertoorujussuuvoq. Nakuuseq, siorasaarineq, pagginnerluunniit pisimanngillat. Pineqaatissinneqarsimasut eqqissisimapput.
- Pisartut amerlapput assigiinngitsunillu naleqqussaasoqarluni, aamma sammisassaqartitsiniarnermut ajornartorsiuteqarsimanngilagut, Peter Fomsgaard oqarpoq.
Pinerluuteqarsimasunut inissiisarfimmi aqutsisup oqarnera naapertorlugu misiliummik nakkutilliisunit 15-inik arfineq-pingasut aggustimi atuariartortussaapput. Tamanna pissutigalugu danskit parnaarussivimmi nakkutilliisut tallimat tikisinneqarlutik qaammatini tulliuttuni sisamani sulissapput.
