Aqqusiniliornissaq suli isummerfigineqanngilaq

Ineqarnermut angallannermullu Naalakkersuisoq Jens B. Frederiksen inatsisartunut ilaasortap Malik Berthelsenip Siumumut ilaasortap paragraf 37 atorlugu naalakkersuisunut apeqquteqaataanut akissuteqarluni suli isummerfigineqannginneraavoq.

Sisimiut Kangerlussuullu akornanni aqqusiniliornissaq, Angallannermut Ataatsimiititaliarsuarmit piviusorsiortuunnginnerarlugu nalilerneqartoq, Naalakkersuisoqatigiinnit isumaqatigineqarnersoq, Malik Berthelsenip apeqquteqaammini  aamma paaserusuppaa.

Sisimiut Kangerlussuullu akornanni aqqusiniliortoqassagaluarpat takornariaqarnikkut taassumalu kingunerisaanik nunatta aningaasaqarneranut qanoq iluaqutaasinnaassuseqartiginera Naalakkersuisunit misissuiffigineqarnikuunersoq, Malik Berthelsenip apeqquteqaammini akissutissarseruppaa.

Assartuussineq pillugu isumalioqatigiissitap innersuussutai politikkikkut suli isummerfigineqanngitsut, Jens B. Frederiksenip akissuteqaammini oqaatigaa.

Assartuussineq pillugu Isumalioqatigiissitap innersuussutai aallavigalugit qanoq tulleriiaarisoqassanersoq naalakkersuisunit suli aalajangiisoqanngilaq, taamaattorli Assartussineq pillugu Isumalioqatigiissitap innersuussutai misissueqqissaarnernik sukumiisunik tunngaveqartut, siunissami tulleriiaarinissami pingaartinneqassasut Jens B. Frederiksen oqarpoq.

Taamatuttaaq Isumalioqatigiissitap aqqusiniliornissamut atatillugu misissueqqissaarnerani,  takornariaqarnerup annertusisinnaanera, taamatullu aqqusiniliorniassap nunap immikkoortuani ineriartornerup annertusarnissaanut periarfissat immikkut ittumik ilanngunneqartut Jens B. Frederiksen oqarpoq.

Sunniutissat taakkua ilanngunneqaraluartut Assartuussineq pillugu Isumalioqatigiissitap innersuussutaani,  iluanaaruteqarfiusinnaasutut isumaqarfigineqanngilaq.