Aqquserngit qullii biilertunit uppitinneqartartut inuiaqatigiinnut akisuvoq

Biilertut ajutoornerisa kinguneranik aqqusinerni qulliit uppitinneqartartut Nukissiorfinnut ukiumut 700.000 koruuninik akeqatartoq Kommuneqarfik Sermersuumut 500.000 koruuninik ukiumut akeqartarpoq.

Nuummiinnaq biilertut ajutoornerisa kinguneranik aqqusinerni qulliit uppitinneqartut taarsersornerinut, Nukissiorfinniit 700.000 koruunit angullugit ukiumut atorneqartartut, Nuummi aqqusinerni qullernut akisussaasuusoq, Ujarak Kreutzmann oqarpoq.

- Nuummi aqquserngit qulliisa aaqqissuunneqarnerinut aningaasat 500.000-it 700.000 koruunillu akornanni ukiumut atortarpavut.

Nukissiorfiit Linieafdelingianni, tassa aqqusinerni qullernik taamatullu innaallagissap aqqutaat pillugit teamlederiusoq, Ujarak Kreutzmann oqarpoq.

Taassuma aamma oqaluttuaraa, aqquserngup qulliata ataatsip uppitinneqarsimasup taarserneqarnera 15.000 koruuninik akeqartoq.

- Nalunngikkutsigu kina aporsimanersoq taava akiligassaq tassunga naiiunneqartarpoq. Aqquserngup qulliata ataatsip uppitinneqarsimasup taarserneqaranera minnerpaamik 15.000 koruuninik akeqarpoq, tassa napparut, qulleq nutaaq sulisullu sulinerat tassani ilaallutik.

Ujarak Kreutzmannip aamma oqaluttuaraa, aqqusinerni biilertut napparutinullu aportut pingajorarterutaanniit affaat tikillugit kinaassusersineqarneq ajormata, akiligassaq inuiaqatigiinnit akilerneqartartoq. Ujarak Kreutzmannip aamma KNR-imut oqaluttuaraa, biilertut ajutoornerisa kinguernanik napparutit tallimat ukioq manna januaarip aallaqqaataa aallarnerfigalugu taarsersorneqareersut.

Nukissiorfiilli kisimik napparutinut akissaajarneq ajorput.

Aamma Kommuneqarfik Sermersuup teknikkikkut immikkoortortaqarfiata aningaasat 500.000 koruunit ukiumut atortarpai biilertut ajutoornerisa kinguneranik napparutinik aqqissuussinernut taamatullu aqquserngit sinaaniittut avammut nakkarnaveeqqutit nivattaassuarnit aputaajaatinik aserorneqarnerisa kingunerannik.