Aqqanilinnik ukiulimmut anaanaq: Killissatsinnik qaangiisorujussuuvoq

Amerikamiut youtuberit aningaasanik 100 dollarikkaanik Nuummi aqqusinermi inunnut naapitaminnut, uani sapaatip akunnerani agguaanerat inuit attaveqatigiittarfiini oqallisaangaatsiarpoq.

- Takorluunngisatsinnik pisoqarsimavoq, ernerput aqqanilinnik ukiulik atuaqatinilu soraaramik illoqarfiup qeqqatigoorlutik taakkua Brugsenip saavani naapissimavaat. Taava 100 dollarsinik tunitissimapput, Arnarulunnguaq Fleischer Nordstrøm aqqanilinnik ukiulimmut aningaasamillu tunineqarsimasumut anaanaq oqaluttuarpoq.

Aningaasanik teqqialinnillu ‘Make America Great Again’-imik allannertalinnik Nuummi Brugsenip silataani agguaasut tassaapput youtuberit Nelk Boysimik taaneqartartut.

Killissamik qaangiinerusoq

Arnarulunnguaq Fleischer Nordstrømillu ernermi misigisaa killissamik qaangiinerusoq isumaqarpoq.

- Tupattorujussuuvugut killissagut qaangerneqartorujussuungamik uagut akuerinngisatsinnik ernerput oorimik tunineqarluni inummik nalusamininngaanniit.

- 100 dollari annertoorujussuuvoq. 100 dollarimik tunillugu filmiliaralugu uagut akuerinngisatsinnik. Killissatsinnik qaangiisorujussuuvoq, Arnarulunnguaq Fleischer Nordstrøm oqarpoq.

Sumiiffimmi aningaasaq sissoraa

Hans Møllerip amerikamiut aamma naapippai, aningaasanillu tunineqarpoq.

Teqqialimmik aappaluttumik nalunnginneqarluartumik aningaasanillu 100 dollarikkaanik Hans Møller neqeroorfigineqaraluarpoq. Teqqialilli tunniunneqartoq tigunngilaa aningaasallu sissorlugit. Assi © : Johansinnguaq / KNR

- Taava aamma oorikasinnik tuniniaraluarpaannga soorunami ingerlannaq uanga pisiarineqarsinnaannginnama taamaattumik sissorlugit pivakka. Oorimik tuneriarlunga nasamik tunivaannga uupakaatinniarsaralunga Trumpimut illersuisutut isikkoqartinniarsaralunga.

Taamannallu iliuuseqarnera takusassianngorlugu videoliarineqarpoq. Videorlu taanna nunarsuarmi ingerlaartinneqarpoq. Nelk Boysikkunnit aamma.

Aningaasat taakkua sooq agguaanneqarnersut paasiuminaatsillugu, taanna oqaluttuarpoq.

- Nasalersorlugit oorinik tuniorarlugit soorlu pisiassatut pilerpaatigut.

- Nalunngilarpummi Trumpip pisiariniarluta pereernikuummat, massakkut amerikamiut tikittaqattaalerput oorinik tuniorarluta. Sooruna oorinik tunioraasut uagut Amerikaliarunnanngilagut oorinik tunisiartorluta, Hans Møller oqarpoq.

Hans Møller, Arnarulunnguaq Fleischer Nordstrømmillu ernera amerikamiunik tusaamaneqarluartunik naapitsereernerata kingorna, taanna ersarissumik ima kaammattuuteqarpoq:

- Neriuinnarpunga massakkut taama pisoqarnera eqqumaffigineqassasoq, angajoqqaaninngaanniit, atuarfinninngaannit oqartussaniillu ilaa naluarput qanoq kinguneqarsinnaanersoq.

Grønlandsbanki naapertorlugu aningaasanik dollarinik danskit koruuninngortitsiartortut inuit arlaqarput.