Amerikamiut Nuummi aningaasanik agguaassisut

Nuummiut akornanni perpalutsitsisoqartoq.
Biilit attartortakkat matui Brugsenip saavani ullup qeqqata missaani matorpallapput.
Amerikamiut inuusuttut erfalasuata qalipaataanik atisaqartut sanioqqutaminnut aningaasanik agguaassipput.

Erik Absalonsenip Brugsenip saavaniinnermini suna tamaat takuaa:
- Amerikamiut 100 dollarikkaanik tunniussipput. Kikkuunerlutik oqanngillat, kisianni amerikamiusut oqalupput.
KNR-ip ilanngutassiortuata arnap amerikamiunit angutinit aningaasanik tunineqartoq oqaloqatigaa. Taassuma meerarpassuit 300, 400, 500 dollarinillu tunineqartut oqaatigaa.
Tamatuma kingunitsianngua politiit takkupput, biilillu unittarfiat inuerutsillugu.

Youtuberit ilisimaneqarluartut
Danskit tusagassiorfiata, TV2-p taakku amerikamiut marluk Youtube-mit Nelk Boysineersut paasissutissiissutigaa.
Taakku videoliaata ilaanni Donald Trumpimit Trump Force One-imut qaaqquneqarput.
Timmisartoq taanna ernerata Donald Trump Jr.-ip Nuummut sapaatip akunnerata siuliani tikissutigaa.
Grønlandsbanken
Grønlandsbankenimi eqqumiitsumik pisoqarnera aamma maluginiarneqarpoq.
Taakku tusagassiornermut immikkoortortaqarfiata oqarnera naapertorlugu Nuummi aningaaseriviup immikkoortuanut inuppassuit aningaasanik danskit koruuninngortitsiniarlutik takkupput.
- Aningaaserivimmukartoqarnera uppernarsarparput, 18-illu inorlugit ukiullik tamarmik itigartillutigit. Aningaasat ilumoortut pineqarput. Allamiut aningaasaataat pissarsiarisagut misissorpagut, aningaasallu ilumoorput, Grønlandsbanken oqarpoq.