Aqqaluk Petersen siulittaasuuginnarallassaaq

Siulersuisuni maanna ilaasortat ilaasa ilinniarnerminnut atatillugu allanik ulapputeqarnerat pissutaalluni siulersuisut allanngortariaqassapput.

Avalaap siulittaasua Aqqaluk Petersen suliani pissutigalugit Kalaallit Nunaannukartariaqarsimavoq, siulersuisunili amerlanerussuteqartut isumaqatigiissutigaat Aqqaluk Petersen siulittaasutut kattuffiup ataatsimeersuarnissaata tungaanut ingerlaannarsinnaassasoq.

Kattuffimmi aningaaserisutut ulluinnarni akisussaasoq, Tina Naamansen, Bjørk L. Kristensenimit taarserneqarpoq. Allanut tunngassuteqartunut ulapputeqarnini pissutigalugu Tina Naamansen aningaaserisutut tunuarniuteqarpoq.

Paasissutissiinermik ataqatigiissaarisup Mira Kleistip ilinniarnerminut atatillugu Costa Ricamiinnerata kingunerisaanik, Miki Jensen paasissutissiinermik ataqatigiissaarisunngorallarpoq.

Kattuffilli ingerlalluarpoq. Ukiumoortumik naapeqatigiittoqaqqammerpoq, ukiup atuarfiusup aallartinnerani naapeqatigiittoqartarami.

Nibemi naapeqatigiittoqarpoq. Arsaalluni unammiuaarnerit, nallukattarnermik unammiuaarnerit allallu aaqqissuunneqarput, naggataatigullu katerisimaartoqarluni.