Aqqaluk Lyngep Ban Ki-moon ataatsimeeqatigaa

ICC-p siulittaasuata Aqqaluk Lyngep Samellu Siunnersuisoqatigiisisa siulittaasuata Aili Laavop Issittumi nunat inooqqaavisa suliniaqatigiiffii nunarsuullu sinnerani nunat inoqqaavi assigiinngitsut qulit allat sinnerlugit Naalagaaffiit Peqatigiit generalsekretæriat ataatsimeeqatigaat.

Nunat Inoqqaavisa Ataavartumik ataatsimiititaliaata ataatsimiinnerata ammaanersiorneqarnerani Naalagaaffiit Peqatigiit generalsekretæriata Ban Ki-moonip nunat inoqqaavisa sinniisaat allaffimminut ataatsimiigiaqquai.

Naalagaaffiit Peqatigiit nunat inoqqaavi pillugit septembarip qaammataani ataatsimeersuartitsinissaa aammalu silap pissusiata allanngoriartornera pillugu nunat siuttuisa New Yorkimi ataatsimeersuarnissaat, aamma septembarimi pisussaq, ataatsimiinnermi eqqartorneqarput.

Aqqaluk Lyngep radioavisiimut oqaatigaa, Naalagaaffiit Peqatigiit ukiuaru ataatsimeersuarnissaanni nunat inoqqaavi pillugit ataatsimeersuarnissamut nunat inoqqaavisa sinniisuisa naalagaaffiit sinniisaat allat nalingalugit peqataanissaannut tapsersersuisimaneranut Ban Ki-moon qujaffigisimallugu.

Silap pissusiata allanngoriartornerata nunanut issittormiunut, ileqquusumik inuussutissarsiutinut issittormiullu inuuniarnikkut atugarisaannut kingunerisai annertuumik ernumassutigineqartut Aqqaluk Lyngep Issittormiut suliniaqatigiiffii sinnerlugit oqaatigaa.

Ban Ki-moonip nunarsuarmi nunat siuttuisa silap pissusiata allanngoriartirneranut pimoorussamik iliuuseqartariaqalernerannut Nunatsinnut qanittukkut tikeraarsimanini assersuutissatut taavaa. Generalsekretærillu Aqqaluk Lynge inuulluaqqugamiuk ilanngullugu Naalakkersuisut siulittaasuannut inuulluaqqussutini apuuteqquaa.