Aqqaluk Lynge ullumi ataqqinaammik doktorinngortitaavoq
Aqqaluk Lynge ilisimatusarfimmi Dartmouth Collegemi New Hampshiremi, USA-mi ilisimatusarfiit pitsaanersaasa ilaanni, ilinniartut isiginnaartullu 10.000 –it isiginnaartoralugit, seqinnareqisumi, ullumi ataqqinnaammik doktorinngortinneqarpoq.
Aqqaluk Lynge doktorit atisarisartagaannik qernertumik uliguaqartoq ilisimatusarfiup pisortaanit, uliguaata qaavanut qaqortumik angivallaanngitsumik uligualerneqarpoq, doctor honoris causa-mik imaluunniit doktorinngorneranut takussutissiisumik.
Ilisimatusarfiup pisortaata Jim Kimip, aningaaserivissuarmi verdensbankimi qanittukkut pisortanngortitaasup, oqalugiarami Aqqaluk Lynge taama pitsaatigisumik ataqqiniarneqarnera pissutissaqartoq oqaatigaa, Aqqaluk Lynge tassaammat nunarsuatsinni naggueqatigiinnik Inunnik paasinnillunilu suliniutinik nutaanik piviusunngortitsisartoq, naggueqatigiillu Inuit tamaasa ataatsimut oqariartuuteqalersisimallugillusooq.
Ilisimatusarfiup pisortaata Aqqaluk Lynge Ghandimut Mandelamullu assersuuppaa, Inuit nunarsuarmilu nunat inoqqaavisa nutaanik pisinnaatitaaffeqalernissaannik anguniagaqartilluni nakuusernani ilungersuuteqartarmat.
Ilisimatusarfiup pisortaata oqalugiarnermini aamma eqqaavaa Aqqaluk Lynge tassaasoq silap pissusaata allanngoriartorneranut atatillugu qasusueqaluni nunat inoqqaavinik illersuilluni oqaluttartoq, tamannalu nunarsuarmi tusaamaneqaatigisorujussugaa ataqqinaatigigaalu.
Jim Kim oqalugiaatini naggaserlugu oqarpoq Aqqaluk Lyngep ilisimatusarfimmut Dartmouthimut inuit ilorpiamikkut pinnissusii talliamigut, suliamigut oqalugiartarnermigullu takutittarai.
Taamaattumik Dartmouthimut nuannaarutissaavoq ullumi ataqqinaammik doktorinngortinneqaravit, ilisimatusarfiup pisortaa Jim Kim naggasiilluni taama oqarpoq.
