Aqqaluk Lynge Naalakkersuisunut: Kisitsisinik pinnguarneq tamaannga killeqartariaqarpoq
Naalakkersuisulli siulittaasuata, Aleqa Hammond-ip tusagassiutinut ullumi nalunaarummini tamanna pillugu ima allappoq.
- Naalakkersuisut akissuteqaamminni kukkusumik paasissutissiisimanerarneqarnerat eqqunngilaq. Taamaattumik Naalakkersuisunut pisuutitsiniaanerit KNR-imi aamma Sermitsiami ippassaq saqqummiunneqartut, aammalu Inatsisartut ataatsimiittarfianni ippassaq issuarneqartut tunuartinneqassasut kaammattuutigissavara, Aleqa Hammond tusagassiutinut nalunaarummini allappoq imalu nangilluni.
- Politikkikkut oqallinnitsinni inussiarnersumik nipeqartarnissaq, aammalu oqallinnerit - aamma tusagassiuutitigut - pissusiviusunik aallaaveqartarnissaat pingaaruteqarpoq aammalu suliat imarisaannut pineqartunut tunngatillugu salluneraanerit immikkut isornartoqarsinnaanera aallaavigalugu isummerfigineqanngitsut saqqummiunneqartariaqanngikkaluarlutik, Naalakkersuisut siulittaasuat allappoq.
Kisitsisit assigiinngitsut assortuussutaalernerannut pissutaanerusorinarpoq, ICC Canada-mit kisitsisit nutaarluinnaat toqqammavigalugit, Aqqaluk Lynge qanittukkut saqqummiimmat.
Naalakkersuisulli siulittaasuata Naalakkersuisoqarfianit kisitsisit allaanerusut pissarsiarineqarsimasut nalunaarutigineqarpoq, tassa ICC Canada-p pisortanit tapiissutisiarisartagaat ICC Greenland-ip tapiissutisiarisartagaannut naleqqiullugit 1 procentiinnarmik assigiinngissuteqartut nalunaarutigineqarlutik. Tassa ICC Greenland-ip aningaasartuutaasa 65 procentii Naalakkersuisunit tapiissutigineqartartut oqaatigineqarluni.
- Naalakkersuisut piffissamut 2013-2014-imut naatsorsuutit nutaajunerusut 31. marts 2014-imi naammassineqartut, ICC Kalaallit Nunaannit innersuussutigineqartut, piginngilaat. Assilinerinik tunniusseqqullugu ICC qinnuigineqarpoq, aammalu Naalakkersuisut taassuma tigunissaa utaqqivaat. Naalakkersuisut siulittaasuat tusagassiutinut nalunaarummini ilaatigut taama allappoq.
ICC-ip siulittaasua, Aqaluk Lynge tamassumunnga ualisoq akissuteqarluni ilaatigut ima allappoq.
- Maanna kisitsisinik pinnguarneq naammalerpoq, torersumillu paasissutissiinitsinnik pasinarsaarineq unittariaqarpoq. ICC isumaqarpoq maanna pisortatigoortumik iluameersumik una suliassaq suliarineqartariaqalersoq, Namminersorlutillu Oqartussani Nunanut Allanut pisortaqarfiani atorfillit ICC-milu atorfillit kiinarsillutik naapittariaqarput paasissutissat suut ujartorneqarnersut paaseqatigiissutigiumallugit. ICC-ip siulittaasua, Aqqaluk Lynge akissummini ualisoq taama allappoq.