Aqqaluk Lynge amerikamiut tv-anni
USA-mi tv-qarfiit annersaasa ilaat, NBC TV, sapaammi unnuit tamaasa nalunaaquttap akunnerani nutaarsiassanik immikkut aallakaatitsisarpoq. Ippassaq sapaammi silap pissusiata allanngoriartornera taamaattumillu Nunarput aamma sammineqarput.
"Ukioq naallugu silarloqattaartoq! Silap pissusiata allanngoriartornera maannakkununa malugigipput?" Aallakaatitassiaq taama taaguuteqarpoq. Aallakaatitassiaq Ilulissani aallartippoq, Aqqaluk Lyngelu ima oqarpoq: "Ukiuni tuusintilikkaani maani najugaqarpugut, sooruna ilissi eqqugaanissaraluassinnut taarsiullugu uagut maanna eqqugaasugut? Silap pissusiata allanngoriartornera ullut tamaasa misigisarparput, aatsaannuna ilissi malugisinnaalerissi," ICC-p siulittaasua oqarpoq.
USA-mi ukiormanna silarlunnerujussua aallakaatitassiami sammineqarpoq. Anorersuarujussuit illunik aseruisut, panernersuaqartarnera, Californiami 2014-imi orpipassuarni ikuallannerit 800-t sinnerlugit mannamut kinguneqareersoq, aamma USA-mi, Europami Tuluillu Nunaanni qarsutsinerujussuit. Eqqaamaneqarsinnaasutut aatsaat taama silarlutsigaaq. Sermersuup aakkiartornera aallakaatitassiami aamma sammineqarpoq, aamma silamut malunnaatit qanoq imminnut ataqatigiinerat oqaluttuarineqarlutik.
Ann Curry, Amerikami tv-mik aallakaatitsisartutut ilisimaneqarluartoq, aallakaatitassiamik ingerlatsisuuvoq, aallakaatitassiallu naanerani Ilulissani sikup sinaani Aqqaluk Lynge ingerlaqatigaa, taannalu kingulliulluni ima oqarpoq:
- Igalaakkut silammut isiginnaariarit pinngortitallu kusanassusia takullugu, illersortariaqarparput paaralugulu, ICC-p siulittaasua, Amerikamiunut tv-kkut isiginnartartunut oqarpoq.
