Aqqalu neriuppoq, arlaanni nunatsinni nukittunersanngorumaarluni
Qeqqiinnarluni kivittaarineq poorsuillu 140 kiilukkaat minutsimut arlalippassuariarluni kivittaagassat.
Tassaapput Kalaallit Nunaanni nukittunerpaanngorniunnermi unammissutissat ilaat. Unammineq Fitness.gl-imit aaqqissuunneqartoq taaguuteqarpoq Greenlands Strongest.
Peqataassapput ukunani nukittorsartartut: Uummannaq, Aasiaat, Ilulissat, Nuuk nutaartatullu Qaqortoq.
Kisianni Aqqalu Lukassen Ilulissaneersoq 15-inillu ukioqartoq ukioq manna isiginnaartuuginnartariaqarpoq.
Ullut ilaanni unammeqataasalerusuppoq. Aqqalu Lukassen ataatani ilagalugu Ilulissaniit Nuummut una sapaatit akunnerat sisamanngormat isiginnaariarlutik tikipput.
- Soqutigisarigatsigit ataatagalu, pingaartinnikugatsigu qanimut isiginnaarnissai. Mikillunga, mikininniilli soqutigilerpara taanna immaqa peqqutaaneruvoq ilagisarnera ataatama haalimi, KNR-imut oqarpoq.
Aqqalu Lukassen nukkassartartuuvoq 13-iliisussaallunili aallartissimalluni. Aqqalu Lukassen kivittaarisartuuvoq. Qeqqiinnarluni, nissuni peqillugit aamma issiavimmut takisuumut nerfallarluni kivittaarineq misiligartareerpai. Taakkuupput unammersuarnermi Greenlands Strongest-imi unammissutaasartut.
Greenlands Strongest 2024-imi ilaaffigerusuppaa.
- Aappaagu ilimanaq unammissutigisartagassaat sungiusalaariarlugit peqataaniaalussasunga.
Naligiittorujussuusut
Aqqalu Lukassen nunatsinni nukittunerpaanngorusussinnaasuni kisimiinngilaq.
Kim Ujarak Lorentzen ukiorpaalunni nunatsinni nukittunerpaavoq, ajutooqqaninili pillugu siorna peqataasinnaannginnami taamani Juulunnguaq Vetterlain 29-nik ukiulik nukittunerpaanngorpoq.
Aaqqissuisartoq Allan Juhl ukiormanna unammisitsinermik aamma aaqqissuisuusoq oqarpoq Kim Ujarak Lorentzen suli ajutooqqalluni unammeqataasinnaanngitsoq. Taamaattumik nukittuneqqusaannissaq assorsuaq pissanganassaaq.
- Pissartaat Juulunnguaq Ilulissaninngaanniit tamanit unammillerneqassaaq. Kim ukiormanna ilaanngeriarami sinneri naligeeruloorlutik pissanganartumik ingerlassagunarput, taanna naatsorsuutigaarput, Nikkulaat Nuumminngaanniit oqimaannernut nuukkami naligiinnerat taanna pissanganaqutaassaaq, Allan Juhl KNR-imut oqarpoq.
Aamma oqarpoq unammineq allatut ukiormanna aaqqissuunneqartoq, isiginnaartunut pissanganarsarlugu.
- Unammissutit aamma uku allaassagamik – sanileriiginnaavillutik imminnut unammilleqattaassapput, soorlu Ilulissat versus Nuuk, Allan Juhl oqarpoq nangillunilu:
- Isiginnaartunut pissanganartorujuussapput.
Siorna unammersuarnermi kivittaareriaatsit sisamat unammissutigineqassapput: dødløft, log, qamutit 240 kilo aamma poorsuit 140 kilo.
Unammersuarneq tv-kkut KNR2-kkut malinnaavigineqarsinnaavoq arfininngornermi oktobarip 14-iani.
