Aqqa Samuelsen politikkimit tunuartoq

Inuit Ataqatigiinnit Inatsisartuni ilaasortaq, Aqqa Samuelsen, Qasiagiannguani atuarfimmi pisortanngornini pissutigalugu politikkimit tunuarpoq.
Inuit Ataqatigiit inatsisartuni gruppianni siulittaasoq politikkimit tunuarluni atuarfimmi pisortanngorpoq. Assi © : Inuit Ataqatigiit
oktobarip 20-at 2020 08:52
Nutserisoq Mads Lynge

Inuit Ataqatigiit inatsisartuni gruppianni siulittaasoq, Aqqa Samuelsen, politikkimit sulinerminit tunuarpoq.

Aqqa Samuelsen Qasiginnguani Juunarsip Atuarfiani pisortanngorpoq, tamannalu pillugu politikkikkut sulinerminit tunuarniuteqarluni. Inuit Ataqatigiit tusagassiutinut taama nalunaaruteqarput. 

- Pisortanngornera politikkikkut tunuarninnut pissutaanerpaavoq, atorfittaanni politikkikkut sumulluunniit attuumassuteqannginnissaq pingaartikkakku apeqquserneqarsinnaassanngimmallu, Aqqa Samuelsen oqarpoq.

AAMMA ATUARUK Kielsen akerliussutsimik takutitsisunut akissuteqartoq: 2022-nngortinnagu qinersisoqassanngilaq

Meeqqanik sullissineq uummateqarfigiuarsimallugu atuarfimmilu pisortanngornissaq kissaatigisimallugu, Aqqa Samuelsen oqarpoq.

Inuit Ataqatigiit siulittaasuata Múte Bourup Egedep Aqqa Samuelsenip politikkimit sulinerminerminit tunuarnera ugguaraa, siunissamili sulilluarnissaanik kissaallugu.

- Aqqa politikkimit tunuaraluarluni uummateqarfigisani, tassa meeqqat sullikkusummagit qularinngilluinnarpara inuiaqatigiinni sulinermigut kivitseqataalluarnini nangissagaa. Siunissamilu ajunnginnerpaamik angusaqarluarnissaanillu kissaapparput, Múte Bourup Egede oqarpoq.

Mariane Paviasen Mimi Karlsenimut sinniisutut inatsisartuni maanna sulisoq, Aqqa Samuelsenip tunuarneratigut inatsisartunut ilaasortannngussaaq. 

Mimi Karlsenillu napparsimanerani sinniisussamik allamik aggersaasoqassaaq.