Aputip sisoorsinnaanera mianersoqqussutigineqartoq
- Quassussuup avannaata tungaa Kuanninnguit qulaatungaanni massakkut aputeqartupilussuuvoq. Tassuunaarnissinni mianersussaasi, Sisorarfiit Facebookiminni allapput.
Aputip sisoornissaa ilimananngitsoq, Kunuk Evaldsen Sisorarfinneersoq KNR-imut oqarpoq. Taamaattorli mianersoqqusinissaq pingaaruteqarnerarpaa.
- Massakkuugallartoq uloriananngitsutut nalilerparput. Sila kiatsissagaluarpat ulorianarsinnaavoq, Kunuk Evaldsen oqarpoq.
Apussuit qaartillugit sapaatip akunnerata tulliani sisoortinneqassasut, Kunuk Evaldsenip aamma oqaatigaa.
Ukiut marluk matuma siorna sumiiffimmi tassani aput sisoornikuusimavoq. Qujanartumilli ulloq taanna silarlussimavoq sisorartoqaranilu.