Aputaasannera isertitakissutaavoq
Sisorartarfimmilu sisorartussaqarani inoqarpiarneq ajorami.
- Maannakkorpiaq sisorariarlutik takkuttartut siullermernit ikinneroqaat, maannakkorpiaq taamaatsillugu neriuutissaqarpallaanngilanga.
Nuummi sisorartarfiit marluupput, mikineq anginerlu. Aputeqannginneratalu kinguneranik ukioq manna mikineq kisimi ammatinneqarpoq, sisorariartartullu amerlasuut takkuttannginnerannik kinguneqarluni, sisorartarfimmi ulluinnarni aqutsisoq Knud Chemnitz, sisorartarfiup qamussuaataani ulappuseruttorluni taama oqaluttuarpoq:
- Aputeqannginnerata kinguneranik sisorartarfiup ammasarfii sivikillineqarput. Aputeqarneralu pitsanngorpat ullut tamaasa ammasalernissarput ilimagaarput.
Knud Chemnitz taama naggasiivoq.
Ukiup issaasannera sisorartarfimmut kisimi malunniutinngilaq, aammattaaq ukiorsiutinik ukiuuneranilu timersuutinik pisiniarfinnut kingunipiloqarpoq, Pikkori Sportimilu ukiup issaasannera aamma malunnarsimavoq.
- Malugilaarparput, kavaajaativut oqortut siullermernit amerlanerulaarput, aamma sisoraatit tuninngitsuukkavut amerlanerusut malugaarput. Taamaattumik apinngitsuuissagaluarpat tuninngitsuukkatta amerlivallaarnissaat ilimagaara, Pikkori Sportimik piginnittoq Morten Jørgen Heilmann taama oqarpoq.
Timersuutaarniarfiusup allap Ittu.net-ip oqaatigaa ukiuunerani tuniniaanini iluatsinngitsoortoq. Sisoraatinut atortut ukiuunerani tunisartagaraluamik pingajorarterutaannaat tunisimavaat, pisiniarfiullu piginnittaata Stefan Ittu Hviidip oqaatigaa tuniniakkatik sisorarnermut tunngasut tuniuminaaqisut.
Sisorartarfimmut pisiniarfinnullu ajornartorsiutit soorlumi qaangerneqarsinnaassasut, tassami DMI-p silamik ilimasaarutaanni sapaatip akunnerata tulliani apinissaa neriorsuutigineqarpoq.
