Inuussutissarsiutit

Apussuit eqqaani rubinimik misissueqqissaarnissaq akuersissutigineqarpoq

Aatsitassarsiorfiutileqatigiit True North Gems Qeqertarsuatsiaat eqqaani pinnersaasiassamik rubin-imik piiaasoq, Maniitsup eqqaani sisorartarfiusimasumi Apussuit eqqaani rubineqarfiusumi aatsitassarsiorluni misissuinissamut akuersissummik tunineqarpoq.

Allattoq Jaaku Lyberth

apriilip 15-at 2015 15:11

True North Gems ukiunut tallimaagallartunut aatsitassarsiorluni misissuinissamut akuerineqartoq Aatsitassanut Naalakkersuisoq Andreas Uldum allappoq.

Misissuinissamut akuersissut siorna septemberimi tunniunneqarpoq, tamanna atuarneqarsinnaavoq, inatsisartunut ilaasortap Anthon Frederiksenip paragraf 37 naapertorlugu Naalakkersuisunut apeqquteqaataanut akissummi.

Aamma atuaruk Rubinisiornissamut qularinnikkunnaarput

Naalakkersuisut akissuteqarlutik allagaqarnerminni rubineqarfiusumi misissuinissamut piumasaqaatigineqartut nalinginnaasut tamarmik naammassineqarsimapput.

Tusarniaanermut atatillugu immikkut ajornartorsiutitaqarnera pillugu oqaaseqaateqartoqanngilaq imaluunniit oqariartuuteqartoqarani, taamaattunillu qinnuteqaatip Naalakkersuisunit akuerineqarnissaa inassutigineqarluni, Aatsitassanut Naalakkersuisoq Andreas Uldum allappoq.

Rubin-mik misissuinissamut akuersissuteqarfiusumi Apussuit qanittuani Maniitsup eqqaani rubineqarnera ukiuni 30-ni ilisimaneqarsimasoq, Naalakkersuisut akissuteqaataanni atuarneqarsinnaavoq.

Aamma atuaruk Rubinit nunatsinneersut USA-mi nittarsaanneqalersut

Aatsitassarsiutileqatigiiffik True North Gems misissueqqissaarnissamut piareersarluni aallartippoq , tassani piareersarneqassaaq missiseqqissaarneq qaqugu aallartissanersoq aamma sulisut qassit atorfissaqartinneqassanersut.

Rubinimik misissueqqissaarnissamut akuersissutigineqartoq 63 kvadrat kilometerisut annertutigivoq.