Appat Kalaallit Nunaannit nungutitaaratarsinnaapput

Danmarkimi Timmiarsiuut Peqatigiiffiata - DOF-ip - Namminersorlutik Oqartussanut ammasumik allagaqarluni timmissap nungutitaanissaminut ulorianartorsiortinneqartup piginiagaanerata sivitsorneqarnissaanik pilersaarutiminnik unitsitseqqullugit kajumissaarpai.

- Appat taama ikiliartortigitillugit Kalaallit Nunaanni upernaakkut appanniartarnerup eqquteqqinneqarnissaa sianiitsuliornerussaaq, Egon Østergaard, DOF-imi siulittaasoq, nunarsuarlu tamakkerlugu  suliniaqatigiiffik Birdlife International sinnerlugu allakkanik nassitsisuusoq oqarpoq.

Peqatigiiffik malillugu Qeqertarsuup Tunuani appat piaqqisartut 97 procentii ukiut kingulliit 60-it ingerlanerini nungussimapput. Aamma nunatta kitaata avannaani piaqqiorfik 250.000-inik appaqarfiusoq piniapilunnerup kinguerisaanik appaarussimavoq.

Nuuk Pinngortitaleriffimmi uumassusisilinnik ilisimatuut appat, 2001-imiilli upernaakkut piaqqiorfiisalu nalaanni piniarneqaqqusaanngitsut eqqissisilluinnarneqarnissaannik.

Taamatullu kaammattuuteqartoqarnera politikerit tusaaniartariaqaraat, DOF-ip Nunatsinni immikkoortortaqarfiata Timmiap oqaaseqatartua Hasse Hedemand isumaqarpoq.

- Appa tallimanik ukioqaleraangami aatsaat piaqqiorsinnaanngortarpoq, piaqqiorfiullu nalaani ataasiinnarmik manniliortarluni. Taamaammat appat upernaakkut piaqqiorfiullu nalaani piniarneqartassappata tamanna appat amerlassusaannik ulorianartorsiortitsissaaq, Hasse Hedemand tusagassiorfinnut nalunaaruteqarluni taama allappoq.

- Kalaallit Nunaata Issittumi inuiaqatigiittut piujuaannartitsinissamik tunngaveqarluni ingerlatsisuunerminut uppernassutsini taamaasilluni ulorianarsiortissavaa, Timmiap siulittaasua isumaqarpoq.