Apersortinnermini kanngusutsitaaqqippoq

Anaanaannaqarluni, ataatani qallunaajusoq najornagu, peroriartornermini ilaquttanit aamma nikassagaaneq misigaa, apersortinnermini unnuaq tamaat qiasimalluni oqaluttuarpoq. Ataataga kinaava?-mik qulequtserlugu sammisaqarnerput Anne Sofie Hardenbergip "Ataatamik ilungersuutinik" taallugu atuakkiaanik aallaaveqarpoq.

- Qinngasaarneqartartorujussuuvugut taamanikkut aamma naalliuutigisarnikuuara meeraaninni. Ataataqannginnermut tunngasut annertunerusumik taamani eqqartorneqarneq ajorput. Aamma oqarfigineqartarpugut: "Meeqqat tamakku susassarinngilaat!" Pissutsit taamani taamaannerat soorunami akueriinnartarsimavarput.

Anne Sofie Hardenberg aggustip ulluisa 28-anni 1948-mi inunngorpoq, arni ningiunilu Qaqortumi peroriartorfigalugit. Ataataa qallunaajusoq Kalaallit Nunaanni sulilaariarluni Danmarkimut uteqqissimavoq. Ataataqarani meeraaneq sakkortusimaqaaq, pingaartumik apersortilluni misigisaq.

- Pakatsisinneqarpugut, qanoq ajorisaatigaluta aamma paasivarput.

Anne Sofie Hardenberg ilaquttaminik apersorteqateqarami neriniartarfimmi nalliuttorsioqatiginissaat nammineq toqqarsimavaa.

- Issiaqatigiittussaagaluarpugut fiisterfissatsinnullu iseratta takuarput nerrivik inip qeqqata tungaani ilaminit allaanerusumik inissitaasimasoq.

Nerriviit histip aloqutaatut ilusilerlugit inissitat kaajallallugit qaaqqusat issiasussaagaluarput. Nerrivilli alla avinngarusimatillugu inissinneqarsimavoq.

- Aperivugut kikkununa issiavissaat? Akivaatigut: - Illit anaanallu ningiullu issiavissasi, taava inuit takusinnaassavaasi qanoq ajortigisusi! Uanga qiallunga aallartippunga. Qianermik apersortinnera maluginikuunngilara. Ningiora iseraluarluni animmat, tassa ornipparput.

Anne Sofie Hardenberg nipaarlunngorpoq, allaallu mersernarsaartutut karakterbogiini allaaserineqarluni. Ataataq najortiginagu kinaanera takorluuginnarsinnaasarpaa.

Arlaanni naapissallugu sinnattorisaa, kiisami 1966-imi piviusunngorpoq. Anne Sofie Hardenbergip 17-inik ukioqarluni realskolemi atuartillutik qaammatini pingasuni Danmarkimiinnerminni angunni, Svend Weber kiisami naapippaa.

- Ilinniartitsisorput qummut suaarpoq: Ataatat tikiuppoq, ammukarniarit! Uangali tassa unippunga, ammukarnianng'. Ilama ajattarlunga ammukartippaannga, Anne Sofie Hardenbergip angumminik Helsingør Vandrerhjemmimi naapitseqqaarnini pillugu oqarpoq.

Ulluni tullerni ataataq panialu periarfissamikkut telefonikkut oqaluullutillu naapillattaarput. Ataataali panigiit takoqqaarneraninngaanniit sapaatip-akunneri pingasut qaangiutiinnartut panni ornitsillugu biilinik ajutoorpoq, Bispebjergimilu napparsimmavimmut unitsinneqarluni. Ikiarsigaluaqaluni ateq Anne Sofie uteqattaartuarsimavaa.

- Nakorsat sygeplejerskellu tupigusuutigaat kinaana taanna. Atsama oqaluttuussimavai panininiuna Kalaallit Nunaanneersoq naapeqqammitani ornikkaluarlugu biiliminik ajutoortoq, pisut pillugit nassuiaavoq.

Angutaa ajutoornermi kingunerisaanik toqummat ilisaanerani nuliata Anne Sofie peqataaqqusimanngilaa.

Angummi nuliata qatanngutini imminit ukiunik tallimanik arfineq-marlunnillu nukarliunerusut naapissanngikkai aamma naalakkiutigisimavaa. Aqqalussani ukiut 36-it qaangiummata aatsaat naapippaa. Kisianni angummi arnaa, aanani, atsanilu qallunaat attaveqarfigiuarpai, pingaartumillu atsami naapittarneri puigunaatsuutillugit.

Anne Sofie Hardenbergip kikkulluunniit ataatamik ujarlerusuttut taamaaliornissaannik kaammattorpai - qamuunali nukittunissaq pingaartuunerarpaa - nakkarfissat uaneralaarsuarmiittarmata.

Anne Sofie Hardenbergip ataataqarani peroriartornermini aqqusaartagai artornartut atuaganngorlutik ippassaq saqqummertut tunngavigalugit sapaatip-akunnerani tulliuttumi sammisaq nutaaq aallaartipparput: Ataataga kinaava?

Nittartakkatsinni knr.gl-imi naalaartartut nammineq misigisanik allassinnaapput.