Anthon Frederiksen: Kinguartitsinissaq KANUKOKAp kissaatigaa

Meeqqanut inuusuttunullu ulloq unnuarlu angerlarsimaffiit kommuninit juulip aallaqqaataani tiguneqarnissaat Naalakkersuisut KANUKOKA-llu isumaqatigiissutigereeraluarpaat.

Kisianni KANUKOKA 2009 naalersoq ilaasortaminut tusarniaareerluni tunuarterpoq. Qeqqata Kommuniata kisimi akisussaaffimmik tigusinissaq kissaatigaa.

Tamanna KANUKOKA-p Namminersorlutik Oqartussanut decembarip 18-iani akissutaani atuarneqarsinnaavoq.

- KANUKOKA-mik oqaloqateqartarnigut siornali juunip qaammataa aallartippagut, nunami namminermi pissutsinut naalakkersuisoq Anthon Frederiksen oqarpoq.

KANUKOKA ullumi allappoq isumakuluummernartoq, nunami namminermi pissutsinut naalakkersuisoq aamma isumaginninermut nalakkersuisoq kommuninut KANUKOKA-mullu nalunaarmata, meeqqanut inuusuttunullu kiisalu innarluutilinnut ulloq unnuarlu paaqqinnittarfiit Namminersorlutik Oqartussanit tigummineqaannarallassasut.

- Taamatut isummerneq piffissami aggersumi Namminersorlutik Oqartussanit tusartualissagutsigu aaqqissuussaanermik iluarsaaneq isumannarsisimassaaq, Enok Sandgreen allappoq.

Kommuninik iluarsaaqqinnermi isumaavoq, kommunit pisortat ingerlataannik suliaqarlutik.

Tassalu akisussaaffinnik, maanna Namminersorlutik Oqartussanit tigummineqartunik, kommunit tigooraalernissaat isumaavoq.

- Suliassat kommuninut januaarip aallaqqaatani 2009-mili nuunneqartussaasimagaluit, sulili nuunneqanngitsut ajornangippat januaarip aallaqqaataani 2010-mi nuunneqarnissaat KANUKOKA peqatigalugu pimoorussilluta sulisimavugut, Anthon Frederiksen oqarpoq.

Kisianni KANUKOKA ilaasortaminut decembarimi tusarniaareermat, nipi allanngorpoq.

- KANUKOKA-p ilisimatippaatigut, meeqqanik inuusuttunillu paaqqinniffiit 2010-mi juulip aallaqqaataani tiguneqanngikkallassasut Namminersorlutillu Oqartussaniiginnarallassasut, ilaatigut kommunit ataatsimoorussamik kiffartuussiveqalernissaannut piareersimasoqanngimmat, naalakkersuisunut ilaasortaq oqarpoq.

Taama isummernermut, Qeqqata Kommunia kisimi isumaqataanngilaq, suliasanik nuussinissaq kaammattuutigalugu.

Innarluutilinnik sullissinerup kommuninit maannakkut pilersaarutaasutut, juulimi 2010 tiguneqassasoq, KANUKOKA-p decembarimi inassutigaa, tamannalu Kommuninit amerlanernit isumaqatigineqarpoq, Kommuni Kujalleq isumaqarluni, nuussineq mianersortumik pisariaqartoq.