Anthon F. eqqartuussivimmi oqaatsinut iliuuseqassaaq
Anthon Frederiksen ima oqarpoq:
- Namminersorneq pillugu Inatsit naapertorlugu kalaallit oqaasii pisortatigoortumik oqaasiupput atorneqartussat, taamaattumik tamanna malinneqartussaavoq.
Kalaallit unnerluunneqartut danskisut paasisinnaappata unnerluussutit kalaallisuunngortinneqartariaqanngitsut, Danmarkimi eqqartuussiviit qullersaata 2009-mi aalajangerpaa, taamatulli aalajangiineq Namminersorneq pillugu inatsimmut naapertuutinngitsoq, Anthon Frederiksenip oqaatigaa:
- Namminersorneq pillugu Inatsit naapertorlugu § 20-mi ersarilluinnartumik allassimavoq pisortatigoortumik oqaatsit tassa kalaallisut oqaasiusut, taannalu tunngavigineqarsimasuuppat qularinngilara eqqartuussut taanna allaanerussagaluartoq, Anthon Frederiksen oqarpoq.
Unnerluussutit kalaallisuunngortinneqartannginnerat, Kalaallit Nunaanni eqqartuussisut ernummatigaat.
Kinguaattoornernik kinguneqarsinnaanissaa, inatsisitigullu isumannaatsuunissamut ajornartorsiutaasinnaanera ilaatigut oqaatigineqarluni. Unnerluussutit unnerluussisussaatitaasunit kalaallisuungortinneqartarnissat, taakku isumaqarput.
Anthon Frederiksenilu suliaq taamaammat ingerlateqqinniarpaa:
- Suliassaq taanna Kalaallit Nunaanni eqqartuussiveqarneq pillugu siunnersuisoqatigiinnut qaqissavarput, suliaq tassuunatigut malersoqqinneqarniassammat, Inatsisit atortinneqarnissaannut naalakkersuisoq Anthon Frederiksen oqarpoq.
Taanna suliaq Danmarkip inatsisit atortinneqarnissaannut ministerianut ingerlateqqinniarpaa.
Eqqartuusseriaatsimut inatsisip Nunatsinnit suli tiguneqanngilaq, Danmarkimilu inatsisit atortinneqarnissaannut ministereqarfiup ataani maanna inissisimalluni.