Anthon: Akisussaasut tassaapput danskit naalakkersuisui

Taassuma neriuutigaa pinerlussimasut inissaqartinneqannginnerisa ajornartorsiutaanera siunissaq qaninneq eqqarsaatigalugu aaqqinneqarumaartoq.

- Neriuutigaara pillarneqarnissaminnik utaqqisinneqartartut piffissami qaninnerpaami aaqqiivigineqassasut. Naalakkersuisuniillu pissutsit taamaattut akuersaanngilagut. Kisianni tassa tamassumunnga akisussaasut aningaasaliisussallu tassaapput danskit naalakkersuisui, Inatsiseqarneq pillugu Naalakkersuisoq Anthon Frederiksen oqarpoq.

Atuagagdliutit nittartagaanni ullumi allaaserineqarpoq, danskit inatsiseqarnermut ministeriata, Morten Bødskovip apersorneqarnermini siunnersuutigigaa, annikittunik pinerlussisimasut qaammatinilu arfinilinni inissiisarfimmiittussanngorlugit pineqatissinneqarsimasut namminneq pisuussutiginngisaminnik pillarneqarnissaminnut utaqqisinneqartut, ukiut marluk aappaata qeqqani pinerluutillit inissiisarfiinut inissinneqarsimanngitsut isumakkeerfigineqartarnissaat inissaasuanermut aaqqiissutaasinnaasoq.

Taamatulli aaqqiiniarnermik siunnersuut Anthon Frederiksenip aaqqiissutissaannginnerarpaa.

- Uanga isumaqarpunga ajornartorsiut taamaaliinnarlugu qaangerniarneqarsinnaanngitsoq. Pinerluuteqarsimasullu isumakkeerfigineqartassappata tamanna Inatsisartuni oqallisigineqaqqaartariaqarpoq. Tamannalu ersarissumik Morten Bødskovimut oqaatigaara, Anthon Frederiksen oqarpoq.

Pinerlussimasunut utaqqiisaasumik inissiisarfik Kangerlussuarmiittoq siorna matuneqarpoq, naak tamatuma nalaani paasinarsereeraluartoq pinerlussimasut eqqartuunneqareerneranni inissiisarfinnut utaqqisut 100-nik ikilisimasut. Tamannalu uterfigisariaqaripput Anthon Frederiksenip oqaatigaa.

- Isumaqarpungattaaq Kangerlussuarmi inissiisarfimmik utaqqiisaasimasumik assigusumik pilersitsisoqarpat tamanna aaqqiissutaasinnaasoq. Maannalu takusinnaasakka naapertorlugit tamanna periarfissaavoq siullerpaatut isigineqartariaqartoq, Inatsiseqarneq pillugu Naalakkersuisoq, Anthon Frederiksen oqarpoq.