Anstaltbetjentit ilinniarnerminni oqaatsit marluk pinngitsooratik atortariaqarpaat

Inatsisinut atuutitsinermut ministerip nalunaarutigaa - danmarkimi pinerluuteqarsimasut pillugit isumaginnittoqarfiup qullersaqarfiani suleqatigiissitap innerssuussutaani piumasarineqarsimasoq  pinerluuteqarsimasunut inissiisarfinni suliniarlutik qinnuteqartut tamarmik siuissami oqaatsinik marlunnik atuisuussasut.
 
Taama piumasaqaateqarneq nunatsinni pinerluuteqarsimasunut inissiisarfinni sulisut ilinniartitaanerisa sivitsorneqarluni nutarneqarneranut ilaavoq.

- Alloriarneq  pingaaruteqarpoq, Doris Jakobsen isumaqarpoq.

- Nunatsinni pinerluuteqarsimasunut inissiisarfiinni inissinneqartartut amerlanerit kalaallisut oqaaseqarput.

Tamana pisariaqanngitsumik  aporaannermik pakatsinermillu pilersitsisarpoq,  pinerluuteqarsimasunik inissiisarfinni sulisut inissinneqarsimasunik iluamik oqaloqatigiissinnaanngikkaangata. Oqaatsit marluk atugaanissaannik piumasaqaateqarneq nuannaarutigaara,  tamanna siunissami ajornartorsiutaajunnassammat, Siumut sinnerlugu folketingemi ilasortaq oqarpoq.

Ministeri akissuteqarnermini  inissiisarfinni sulilersussat qinnuteqarnerminni qallunaat oqaasiinik pisinnaasaqarnissaat pingartippaa.

Suleqatigiissitami innersuussutigineqarpoq -  sulilernissamut qinnuteqartut oqaloqatigineqarnerini -  qallunaatut pisinnaasaat nalilersorneqartassasut inissiisarfinni sulisutut ilinniarnerminni qallunaatut ilinniartitsisutigineqartut sapinnginneraat nalilersorneqassammat.

 Ajunnginerusinnaavoq, Doris Jakobsen isumaqarpoq.

- Inissiissarfinni sulilernissamut qinnuteqartut  oqaloqatigineqarnerini piukkunnaateqarnerit immikkoortinnagit - pinerluuteqarsimasunut inissiisarfinni sulisut ilinniartitaanerat nutaaq pilersaarusiorluarneqartariaqarpoq -  qinnuteqartut  ilinniarnerminnni qallunaatut pisinnaasaat qaffassarneqarsinnaammat, Doris Jakobsen oqarpoq.
Pinerluuteqarsimasunut inissiisarfinni sulilersussat ilinniartitaanerat nutaaq 2015-mi aallartinneqarnissaa naatsorsuutigineqarpoq.