Annisettep Kalaallit Nunaat nuannareqaa

Aviisimi Jyske Vestkystenimi, ippassaq saqqummersumi, tamanna allaaserineqarpoq.

Aviisimit apersorneqarnermini nannup niaquanik nooqutalimmik ujameqarpoq. Uigigaluani, Thomas Koppel, 2006-imi toqummat, Nunatsinnut tikeraarami ujameq taanna tunissutisiaraa.

- Kalaallit Nunaanni nipilersorneq misigisaavoq immikkorluinnaq ittoq. Maqaasiuaannarpara. Kalaallit tusarnaartillugit immikkuullarittuaannarpoq. Soorlu ilaqutaralugilluunniit, unillatsiaraangatta kisianni aggerlutik, eqitaaralutik, pakkutaaralutik, tunissutissaminnillu allaat nassartarlutik. Inuiaat tukkusuut, Annisette oqarpoq, Kalaallit Nunaallu allaannginnerarpaa suna oqaluttualiaq, tassami sermeq ukiunik 5.000-inik pisoqaassusilik ussersimavaa, qaqqallu nunarsuarmi pisoqaanersaat attorsinnaasimallugu.

Annisettep aamma uigigaluani kalaallit eqqaamammassuk killitsissutiginngitsuunngilaa.

- Qanoq innersunga kikkut tamarmik paaserusuppaat, oqarfigineqartarpungalu Thomas maqaasigitsik.

- Uillaraluaramali inuunera taama ingerlatiinnarpara, marluullutalu nuannarisavut asasavullu taamaatinnagit: Assersuutigiinnarlugu Kalaallit Nunaannukaqatigiittarnerput attatiinnarpara, Annisette aviisimut Jyske Vestkystenimut oqarpoq.

Taassuma nipilersortartuni Savage Rose peqatigalugit Danmarkimi maanna tusarnaartitseqattaarpoq, uigigaluani Thomas Koppel toqummalli CD-liartik nutaaq ilaatigut ilisaritittarlugu.