Annette Vilhelmsen – Danmarkimi politikkikkut qatangiinnarpoq
Vilhelmsenip Socialistisk Folkepartiimi sulittaasuunerani partiip qinersisartui ima qimarrassimatigaat, qinersisartut isumaannik misissuinerni kingullerni SF Folketingimi partiit mikinersarilersimallugu, qinersisartullu qimarratiinnassappata partii nunguuissinnaavoq ukiullu 50-it Folketingimeereerluni isertitaqanngitsooratarsinnaassalluni.
Annette Vilhelmsen kisiartaalluni tunuartuunngilaq. Aamma partiimi siulittaasup tulliisa marluusut aappaat tunuarpoq taamatuttaarlu politikkikkut oqaaseqartartoq Lisbeth Bech Poulsen Folketingimilu ilaasortaatitat siulittaasuat Karina Lorentzen tunuarlutik. Pernille Vigsø Bagge Folketingimilu ilaasortaatitat siulittaasuattut utaqqiisaasumik toqqarneqarpoq, taannali tulliani qinersisoqalerpat qinigassanngorteqqinnianngilaq taamaattumillu aaqqiinerugallarnerinnartut taasariaqarluni.
SF-ip nutaamik siulittaasortaartinnissaanik suliassaq tullinnguuppoq, tamannalu partiip tunuliaqutaanut suliassaassaarpasippoq angisooq. Mette Touborg Sjællandimi Lejremi borgmesteriusoq partiimilu siulittaasup tullerisai marluusut siulittaasutut qinigassanngortinniaratik oqaatigisimavaat Folketingimilu ilaasortaatitat akornanni siulittaasussatut pikkunnartoqarpallaarani.
Ikaarsaariarfiusumik ingerlatitseqqiisinnaasutut taaneqarsinnaapput SF-itoqqat Holger K. Nielsen aamma Steen Gade, SF-illi siunissamut qularnaarsarnissaanut tamanna aaqqiissutissatut taaneqarsinnaagunanngilaq. Siulittaasussamik qinersimi kingullermi ajorsartutaasoq Astrid Kragh periarfissaasinnaasutut taaneqarsinnaagunanngilaq, siulittaasussatut qinersisoqarnerani tapersersortigisai partii qimararsimammassuk. Ida Auken, Jonas Dahl imaluunniit Pia Olsen Dyhr periarfissaasinnaagunaraluarput, partiilli siunissaa qaamavallaanngilaq, taamaattoqariarmallu politikerit anguagallit SF-ip nungutaanerani siulittaasutut inissisimanissartik orniginartinnavianngilaat.
