Anne-Birthe Hovep eqqaamaneqarnera qulakkeerneqassaaq
Anne-Birthe Hovep, siorna toqusup, suliani 400-t 600-llu akornanniittut qimappai. Uiata Thomas Steensgaardip suliai tamaasa immikkoortiterniarpai. Suliarlu taanna, pilersaarutit malillugit monografimik saqqummersitsinernillu arlalinnik malitseqassaaq.
- Isumaqarama Anne-Birthe ima pingaaruteqartigisoq eqqumiitsuliortutullu ima pikkoritsigisoq, suliaasa nalunaarsorneqarnissaat pissusissamisuuginnartoq, Thomas Steensgaard oqarpoq, taassuma aamma neriuutigaa nulia toqoreersup eqqaamarneqarnissaa qulakkeersinnaassallugu.
Eqqumiitsuliornerup oqaluttuarisaaneranik suliaqartoq Anne-Marie Gjedde Olsen, siornatigut Anne-Birthe Hove pillugu atuakkiorsimasoq suleqatissarsiarisimavaa.
Thomas Steensgaardip Anne Birthe Hove ukiuni 20-ni nuliarisimasaa suliaalu ilisimasaqarfigilluarlugit, suliarisimasaalu tamaasa nassaarisinnaanissaat neriuutigaa.
- Immaqa piviusorsiorpallaanngikkaluarpoq, monotypinimmi amerlasuunik suliaqarsimasoq, taakkulu ataasiaannarlugit naqitaallutik, aamma suliaanik ilisimasaqarfiginngisaminik arlaanni nivingasoqarsinnaanera tunuartinngilaa.
Nordatlantens Brygge aamma Bornholmimi eqqumiitsulianik katersugaasivik Anne-Birthe Hovep eqqumiitsuliaanik 2015-imi saqqummersitsiniarlutik pilersaaruteqarput.