Annaassisiniartartut inunnik sisamanik qaqqami annaassinerminnut nersugaasut

Air Greenlandip qulimiguuliutaani annaassiniartaammi inuttaasut annassiniarnertik ajornakusooqisoq pillugu ippassaq nersorneqarput.

16. juli inuttaasut sisamat sianerfigitipput Uummannamut qanittumi Ikersaap qaqqaani sivingaqisumi sumiiffinni assigiinngitsuni inuit sisamat ingerlariaqqissinnaajunnaarsimasut.  

Taamaattumik Kalaallit Nunaanni Politiit annaassiniarneq aallartitippaat. Inuit taakku qaqqap sivingarnaniit annaannissaannut periarfissaq ataasiinnaavoq, tassa qulimiguulimmik atuinikkut, taannalu politiit Arktisk Kommandomit piniarpaat.

Air Greenlandip annaassiniartartui Ikerasaap tungaanut aallartinneqarput, inuillu ataasiakkaarlugit nassaarineqarput qulimiguulimmullu amoorneqarlutik.

Annaassiniarneq ajornakusoortorujussuvoq, Kalaallit Nunaanni Politiit paasissutissiipput, tassami annaanniagassat sivingasorujussuarmi ujaqqanik sisooriaannartulimmiimmata. Taamaattumik annakkumallugit qulimiguulik qaqqamut qanittuararsuanngortittariaqarpoq suluusani kaavittut qaqqamut ulorianaannartumik qanillisillugit.  

Nalunaaquttap akunnerata affaata missaa qaangiummat annaassiniarneq naammassivoq, inuillu takku sisamat isumannarunnaarlugit qulimiguulimmut eqqunneqarput.

Annaassiniarneq ajornakusooqisoq pissutigalugu inuttaasut taakku sisamat ippassaq Kangerlussuarmi nersorneqarnermik akissarsitinneqarnermillu ataqqinaasigaapput.

- Inuttaasut suliaminnut atatillugu suliinnanngillat, pisumili ajornakusooqisumi ulorianaqisumilu immikkorluinnaq ittumik naammassisaqarput, Kalaallit Nunaanni Politiini politimesteri Bjørn Tegner Bay nersuiniummik tunniussinermi oqarpoq.