Annaassiniartussaq

KNR-ip Niels de Coninck-Smith ilisaritippaa.

Nakorsaasiorfissuarmi ingerlalluartumi, Ferrosanimi, pisortaaneq 2008-mi

Niels de Conninck-Smith ukiut arfineq marluk tassaneereerluni pisortaarusukkunnaarluni aalajangerpoq.

- Allanik misileerusukkama taamaatippunga, isumaqarpungami suliffinni allani siunissaqarluarlunga, Berlingske Tidende-mut taamani oqarpoq.

Taamaalilluni Ferrosanip pilersinneraniilli aatsaat taama sinneqartoortigisoq qimappaa.

Niels de Coninck-Smithimut pissutsit massakkut allaalluinnalerput. Royal Greenlandimi siulersuisuni siulittaasutut ippassaq qinerneqarpoq. Suliassaq imaannaanngissaqaaq, tassami suliffeqarfissuup siorna naatsorsuutai ajornerpaanut ilaapput, amigartoorutit 196 millioni kooruniullutik.

Niuerneq pillugu qaffasissumik ilinniarsimasoq, Niels de Coninck-Smith, torrallaanerinnangajammik misilittagaqarpoq. Ilaatigut siunnersuisartoqatigiinni ingerlalluartuni, McKinsey og Company-mi, pisortaallunilu piginneqataasimavoq.

Aammali ataasiarluni ingerlatsinermi ajortoornermik misilittagaqarluni. Islandimi aningaaseriviit annersaanni naalagaaffimmi pigineqartumi, Kaupthing Bankimi, siulersuisuni ilasortaavoq. Taannalu naakkaattoornikuuvoq, Islandilu aningaasaqarnikkut ajoquseeqalugu.

- Niels de Coninck-Smith-ip misilittagaqassusia pingaartissimavarput. Tassa suliffeqarfinnik aningaasarsiornikkut ingerlanerliortunik makititseqqinniarnernik suliaqartarsimavoq. Suliffeqarfinni, milliardikkaanik kaaviaartitalinni, ukiuni arlalinni pisortaasimavoq. Kiisalu nunat tamalaat akornanni misilittagarpoq. Royal Greenlandip unammilligai tassaapput, nunarsuarmi suliffeqarfissuit allat, taamaattumillu nunat tamalaat akornanni ingerlatsinermik misilittagalimmik inissiinissaq pisariaqaluni, naalakkersuisut siulittaasuat Kuupik Kleist oqarpoq.

Niels de Coninck-Smith Tuluit Nunaanni najugaqarpoq, Peter Grønvold Samuelsenilu taarserlugu siulittaasuunngorluni.