Annaassiniartartut 20.000-t missaat Tysklandimi qarsutsiffiusumi ulapputtut

Tysklandip kujasissuani nunap immikkoortuani Bayernimi kuussuit sinaat qarsutsiffiummata, innuttaasut 3.000-nit ikinnerunngitsut najukkaminnit sapaatit akunnerata naanerani qimagussortittariaqarsimapput.

Annaassiniartartut 20.000-t missaaniittut Bayernimi nunallu immikkoortutut saniliani Baden-Württembergimi sapaammi ulappupput.

Nutaarsiassaqartitsivik dpa taama allappoq.

Qarsutsinerit ulluni arlalinni siallerujussuarnerata kingunerai, maannamullu inuk ataaseq ajunaarsimasoq oqaatigineqarpoq.

Tysklandip kujasissortaani sumiiffik siulleq tallimanngormat qarsutsiffiulermalli annaassiniartartut 40.000-t sullillutik aallartipput. Tyskit sakkutuui aamma annaassiniaqataapput.

Nunap kansleria, Olaf Scholz, Bayernimut ataasinngornermi alakkaassaaq. Süddeutsche Zeitungimi allaaserisaq naapertorlugu. illoqarfissuup Münchenip avannaatungaanut illoqarfimmut Reichertshofenimut tikeraaqqaassaaq.

Scholz angutip qatserisartuusup qarsutsinersuarmi ajunaartup sugisaanut suleqataanullu misiginneqatiginnissummik sapaammi apuussivoq.

Qatserisartoq taanna gummibådi Pfaffenhofenimi annaassiniarnermini issimaffigisaa kinngummat ajunaarpoq. Issimasut allat pingasut annaanneqarsinnaasimapput.

Tysklandimi silasiorfik (DWD) nalunaarpoq, tallimanngormat ima siallertigisimasoq allaat qaammammut taamaalinerani nalinginnaasumik nakkaasartup annertoqatigisimallugu.

Sulilu siallertuarallassassasoq, silasiorfiup ilanngullugu ilimasaarutigigaa, dpa allappoq.