Annaassiniartarnermut sillimaniarnermullu isumaqatigiissut piareertoq
- Air Greenlandip qulimiguuliutaa S-61 ataaseq sillimasussatut piareersimatinneqartassaaq kisianni Bell 212-mik taartissamaateqassalluni. S-61 Kangerlussuarmiit annaassiniartarnissaminut piareersimasassaaq ulloq unnuarlu sapaatip akunnerisa ulluni tamani, Bell 212-li Kujataani annaassiniartarnernut piareersimassalluni, taama annaassiniartarnerni oqartussat qullersaat politimesteri, Bjørn Bay taama oqarpoq.
Isumaqatigiissut sapaatip akunnerani kingullermi inissinneqartoq, politimesteri paasitinneqarpoq. Naalagaaffiup Air Greenlandillu akornanni isumaqatigiinniarnissap inissinneqavinnissaa Inatsiseqarnermut ministeriaqarfiup taamaalilluni akuersissutigaa.
- Qulimiguullit Bell 212 aamma S-61 tassaassapput annaassiniarnernut atorneqartartussat aamma taakku annaassiniartarnernut atorneqartarnissaat, annaassiniarneq pillugu oqartussanit qularutigineqarunnaartut, Bjørn Bay oqarpoq.
Qulimiguullit taakku marluk annaassiniartarnernut atorneqartalersussaagaluartut taamaattoq Bell 212-li, Kujataani illoqarfimmi sumiikkaluarnersumi inissinneqartussaq, ilaasunik angallassisarnera unitsinneqassanngilaq.
- Sullissinissamik isumaqatigiissut malillugu, Bell 212 ilaasunik angallassiinnartassaaq, annaassiniartoqassatilluguli ikiuiartortinneqartassalluni, Air Greenlandip tuniniaanermut pisortaa, Christian Keldsen oqarpoq.
Naak qulimiguullit ilaasunik angallassisassagaluartut annaassiniartoqassatillugu piareersimasassappata, politimesterip, Bjørn Bay-ip tamanna akornutissaqartinngilaa.
- Qulimiguullit annaassiniartarsinnaanerisa saniatigut taakku inunnik assartuussinernut atorneqarsinnaaneri, qullersatut oqassaguma akornutissaqartinngilara. Taamaaliortarnermi ukiorpassuarni ajunngilluinnartumik misilittagaqarfigereerparput, Politimesteri oqarpoq.
Qulimiguullit nutaat, Eurokopterinik taaneqartartut Air Greenlandimit pigineqalernissaata tungaanut qulimiguullit pioreersut ukiuni marlunni tulliuttuni atorneqartarnissaat politimesterimit naammagisimaarneqarpoq.
Qulimiguullit Bell 212-it annaassiniartarnermut atorneqarsinnaarpianngitsutut oqaatigineqartarput. Taakkumi S-61-imit mikinerupput inissakinnerullutik, arriinnerullutik silarluttumilu angalasinnaarpiaratik.
- Bell 212-it annaassiniarnerni amerlanerni atorsinnaasutut ajunngilluinnartutullu nalilerpargut, kisiannili tassa S-61-it pitsaaneroqaat, taama politimesteri Bjørn Bay oqarpoq.
Aviisi Sermitsiaq naapertorlugu, annaassiniarnermut sillimaniarnermullu, SAR-imut tunngasoq qaammammi uani Air Greenlansimit atsiorneqassaaq.
