Anja Hynne Nielsen innarluutilinnut illersuisunngortoq
![](/sites/default/files/styles/image_934x467/public/article_images/anja_hynne_nielsen.jpg?itok=Dkrq5CWt)
Innarluutillit illersuisuat atuuffik marsimili atuuffigineqanngilaq.
Christina Johnsen atorfimmi ukiuni pingasuni affaanilu atorfeqareerluni marsimi soraarpoq. Taassuma taartissaanik Naalakkersuisut maanna nassaarput. Anja Hynne Nielsen innarluutillit illersuisuatut decembarip aallaqqaataanit atuutilissaaq.
Naalakkersuisut tusagassiuutinut nalunaaruteqarlutik paasissutissiipput.
AAMMA ATUARUK Innarluutillit illersuisuat: Taamaammat soraarniuteqarpunga
Anja Hynne Nielsenip inuit innarluutillit siusissumik immikkullu isimannittumik aallaqqaataaniilli ikiorneqartarnissaat pillugu suliniutit ilaatigut suliarissavai.
- Inuit pisinnaasakillisimasut eqqortumik tapersersorneqassapput tapersiutinik atortulerneqassallutik aamma suliniarfigineqassallutik, taamanngippat ilinniarneq, sulineq aamma sunngiffimmi sammisaqarneq immikkoortinneqarnikkut annaaratarsinnaammatigit. Tamatuma nassatarisinnaavaa kiserliorneq, immikkoorneq aamma inuunermi nalilinnik amigaateqarneq, Tiliumi oqaaseqartartutut toqqarneqaqqammersoq oqarpoq.
Eskimologimi kanditatitut ilinniagaqartoq
Anja Hynne Nielsen retorikimi (oqallorinnermi) bacheloriuvoq, eskimologimi kandidatiulluni taannalu Inatsisartut Allattoqarfianni ukiuni sisamani ilaatigut atorfeqarpoq.
Innarluutilinnut illersuisunngortoq ’Hjertebarnet’-imi tassa angajoqqaanut meeqqaminnik qaratsamikkut innarluuteqartunik angerlarsimaffimmi sungiusaasartunut peqatigiiffimmi suliniaqataasimavoq. Tamatuma saniatigut inunnut innarluutilinnut inatsisit pisinnaatitaaffiillu ukiuni kingullerni ilisimasaqarfigillualersimavai.
Naalagaaffiit Peqatigiit Innarluutillit pillugit isumaqatigiissutaat illersuisunngortup suliarisassaani qitiussaaq.
- Nammineerlunga misigaara innarluutilinnut suliniaqatigiiffiit innuttaasunut innarluutilinnut ataasiakkaanut qanoq pingaaruteqartigisut, aamma malugaara Tilioq Kalaallit Nunaanni innarluutilinnut suliniaqatigiiffinnik suleqateqarluartoq. Suleqatigiinneq taanna ingerlateqqinniarpara annertusarlugulu, Anja Hynne Nielsen oqarpoq.