Aningaaserivik: Nunatta aningaasaqarnera suli patajaakkallassaaq
Taassumalu politikerivut pitsaasumik aningaasaqarnikkut politikeqarnerarlugit nersorpai.
- Politikerivut aningaasaqarnikkut isumatusaartumik politikeqarsimapput. Maani aningaasaqarnermi oqimaaqatigiittumik ingerlatsinissaq ukiuni arlalinni sulissutigisimavaat. Taamaammat nunani allarpassuarnitulli atugaqanngilagut. Akiitsorpassuarnik nammagaqanngilagut. aamaammat aningaasarsiornikkut ajornartorsiorneq piffissami qaninnermik Kalaallit Nunaannut suniuteqassasorinmngilara. Taamannerli ukiut arlerpatigit malugissavarput, Peter Petersen oqarpoq.
Aningaasalersuinikkullu ajornartooqqaneq ukiuni amerlasuuni atuutissagaluarpat, aatsitassarsiortut aallussinialeruttorneraanni nunatsinnut sunniuteqassasoq, aningaaserivimmi sullissisunut pisortaq naliliivoq.
- Nunarsuup ilaani aningaasarsiorneq unittoorpat, taava soorunami Nunatsinni uuliasiorusuttut aatsitassarsiorusuttulluunnit aningaasanik pissarsinissamut periaerfissat millissaaq. Aamma aatsitassanik - soorlu saviminissamik uuliamilluunniit piserusussuseqarneq millissaaq. Tassalu aningaasarsiornikkut ajornartorsiorneq sivisoorsuanngorpat sakkortoorsuanngorpallu, maani soorunami aamma malugissavarput, Peter Petersen oqarpoq.
Nunatsinni aningaasarsiornikkut politikkimik nersuinermi saniatigut, aamma nunatsinni aningasaqarnerup immikkuullarissumik atugarissaartitaanera, Peter Petersenip tikkuarpaa.
Ataatsimoortumik tapiissutit allanngoranngitsumik angissuseqartut aalisarnikkullu isertitat pitsaasut, aningaasaqarnerput qajannaatsuutikkaat nunanullu allarpassuarnut naleqqiullugu patajaatsuusoq, nalilerpaa.
Aamma Grønlandsbanki BankNordic sinnerlugit perruualaarpoq, Danamarkimi Europamilu nunani allani bankinut naleqqiullutik taarsigassarsisitsinermut akisussaassuseqarnerusumik periaaseqarnerarlutik.
- Akissagut naapertorlugit tarsigassarsisitsisarpugut. Uninngasuutit sinnerlugit taarsigassarsitsisarneq allarpassuarni ajornartorsiutaagami, taamaalillutillu imminnut ajutoorteqqajaallutik. Uagut taamaanngilagut, uagut uninngasuutivut taarsigassarsiarititatsinnit amerlaneroqaat, aningaasaerivimmi pisortaq oqarpoq.
Taamaakkaluartorli Danmarkimi aningaaseriviit tulleriiaanginnarlutik nakkaattoortut Grønlandsbanken malunniutionngitsuunngillat.
Sullissisunut pisortaq Peter Petersen naapertorlugu Grønlandsbanken aningaasseriviit annaanniarlugit Danmarkimi naalakkersuisut aaqqiissutaannut 2008-imiilli 50 millioni koruuninit ikinnerunngitsunik akiliisimavoq.
- Aningaasseriviit annaanniarlugit Danmarkimi naalakkersuisut aaqqiissutaannut suli ilaavugut, sulilu akileeqataasarluta. Taamaammat Danmarkimi ajutoortoqaraangat akileeqataasarpugut, tamannalu uggorineqarsinnavoq. Kisianni isumaqarpunga, aningaasaliineq ajunngitsuusoq. Tassami Danmarkimi aningaaseriveqarneq ajutooraluarpat tusaamanerlutaalerlunilu, taava aningaaserivimmik ingerlatsineq suli ajornarnerulissaaq, taamalu pisoqarpat uagut aammaarlaatigut eqqugaassaagut, Grønlandsbankenimi sullissisunut pisortaq Peter Petersen oqarpoq.
