Aningaaseriviit taarsigassarsisitsisarfiit KNI nassuiaateqaqquaat

Aviisimi allaaserineqartut tunngavigalugit pisortaanerup Claus Jensenip soraarsinneqarnerata, aamma siulersuisuni ilaasortat pingasut pisortallu marluk akerliullutik sooraarnerisa kingunerisaanik taama pisoqarpoq.

Aningaaserivimmi tusarfigisaq, aterminik saqqummiusseqqusinngitsoq, aviisimit oqarnerarneqarpoq suliffeqarfiup oqartussaasunit pigineqartup politikikkut aqunneqarnera pineqarnersoq aningaaseriviit eqqasuutigigaat. Kisianni aningaaseriviit taarsigassarsititsisuusut namminneq ataatsimiinnermut tunngaviusoq itisilerusunngilaat.  

- Uagut sullitavut ataasiakkaat pillugit oqaaseqaateqanngisaannarpugut. Kisianni ataatsimut isigalugu taarsigassarsititsinitsinnut tunngatillugu ingerlatsivimmi pisortaasut kikkuuneri nakkutiginiartorujussuusarparput. Tamatumani pineqarput ingerlatsiviup siulersuisui, aamma ingerlatsiviup ulluinnarni ingerlatsinermi pisortarisai. Taamatuttaaq uagut nakkutiginiartorujussuuvarput tassanngaannartumik allanngortitsoqartarnera, FIH Erhvervsbankimi pisortaaneq, Henrik Sjøgreen, Berlingske Tidendemut oqarpoq.

Berlingske Tidendemi allaaserisat tunngavigalugit aningaaseriviit pineqartut tassaapput FIH Erhvervsbank, SEB, Commerzbank, Bank Nordik, Arbejdernes Landsbank aamma Grønlandsbanken.

Ataatsimiinneq Københavnimi sapaatip-akuneranni tulliuttumi pissaaq.