Aningaasat uuliasiornermi isertitat eqiasuttunngortissinnaavaatigut
Taassuma Arabiami nunani uuliasiorfiusuni aningaasaqarniarneq politikkikkullu pissutsit ukiorpaalunni malinnaavigilluarsimavai. Nunammi taakku imatut taasarialinnik tunisassiunngillat, tassalu uuliaannavik kisimi isumalluutigineqarluni. Uuliamillu isertitat atorlugit innuttaasut nukatsitarineqarput, akileraarutinik akiliisinneqarneq ajorlutik, inuuniarnermikkullu allaat ingasaginarsinnaasumik neqeroorfigineqartarlutik. Nunat taamaattut ernianik isumalluuteqartutut taaneqartarput.
- Nunani ernianik isumalluutillinni inuiaqatigiit aaqqissuussaanerat kukkuluttorfiusimagajuttarpoq, tassami inuiaqatigiit sulerulunnissaannik, ilinniagaqarluarnissaannik ilami inuunerminni ilungersulaarnissaannik kaammattorneqarneq ajormata, Martin Hvidt oqarpoq.
Tassa nunani taakkunani innuttaasut sivikilluinnartunik suliffiusartuni akissarsiagissaartinneqaqalutik naalagaaffimmit isumagineqareertarput. Suliassallumi ilungersunalaarsinnaasut tamavimmik nunanit allamiunik tikisitanik millionilikkaajusunit isumagineqartarput.
Inuiaqatigiittullumi taamatut aaqqissuussinerit ajornartorsiutaaleriartuinnavipput. Uuliammi akiata aalaakkaajunnaariartuinnarnerata saniatigut nunani uuliaatilissuarni innuttaasut amerliartupilooqaat.
- Tassa inuulluataarnerup kingunerisaanik inuusuttuaqqat amerliartulipiloorput, taakkulu angajoqqaatik assigalugit qaffasissumik pisortat suliffeqarfiutaani akissarsiagissaartinneqarlutik inuunissartik naatsorsuutigereerpaat. Pisortalli suliffeqarfiutaani sulisorineqarsinnaasut naammareeqimmata periarfissaajunnaalereerput, tassalu namminersortut suliffeqarfiutaani unammillernaqisuni kingulliarsuit suliffissarsiornissaat periarfissatuaaleriartuinnarluni, Martin Hvidt oqarpoq.
Taamaammat nunatsinni uuliamik qalluisoqalissangaluarpat pissutsit taamaattut aamma atuutilissanersut Martin Hvidt-ip ilimaginerlugu.
- Aap, taamatut pisoqariaannaavoq. Tassami innuttaasut ilinniarluarsimasut sulerusussuseqartullu pilersereersimanngikkaanni taama pisoqariaannaavoq. Aamma aningaasarpassuarnik isaalertussanik naalakkersuisut aqutsilluarnissaat pisariaqarpoq, tassami aningaasarpassuit asuli inuiaqatigiinnut tunniussuunneqaannassangaluarpata nioqqutissat akitsoriartupiluulernerinik kinguneqariaannaavoq, inuinnaallu namminneq pilersitsitserusunnerisa kimeeruttoorneranik kinguneqarsinnaalluarluni, Martin Hvidt, Syddansk Universitet-imi Kangia Qiterleq pillugu ilisimatusarfimmi lektoriusoq Ph.D-usorlu taama oqaluttuarpoq.
Martin Hvidt, Arabiami uuliap kingunerisimasai pillugit Ilimmarfimmi ippassaani oqalugiarpoq.