Aningaasat tassa taakkununnga naammapput
Ukiut qulikkaat arlallit S-61 nunatsinni ilaasunik angallassereerluni ilaasunik Qeqertarsuup tunuani kujataanilu angalassiunnaarpoq. Qulimiguullit mikinerit silarlummut saperngujanerit atorlugit maanna timmisartuussisoqarpoq. S-61-li uteqqinnavianngitsoq Air Greenland erseqqissaavoq.
Namminersorlutik Oqartussat Air Greenlandillu akornanni sullissinissamik isumaqatigiissut nutaaq ukiortaami atulerpoq. Atuunnera sivisunngikkaluartoq S-61 maqaasisaalereerpoq kujataani Qeqertarsuullu tunuani Bell 212-mik timmisartuussinerni kinguaattoornerit taamaatiinnarnerillu arlaqarmata. Namminersorlutilli Oqartussat isumaqatigiissummut aningaasaliissutaat timmisartumut tassunga taamaallaat naammattut Air Greenland ilisimatitsivoq isumaqatigiissutillu atulinnginnerani innuttaasunik ataatsimiisitsinerit arlallit ingerlatereersimavaat.
- Politikkerinut, atorfilinnut innuttaasunillu ataatsimiisitsinerni unneqqarilluta nassuiarparput Bell 212 timmisartuusoq allaannerusoq. Taanna S-61-ip ilaasorisinnaasaasa affaannai ilaasorisinnaavai anorlerpallaanngitsumilu taamaallaat timmisinnaavoq – kisianni tassa – suliffeqarfiup sullissineranut aningaasat akiliutigineqartartut tassunga taamaallaat naammapput, Air Greenlandimi pisortat qullersaat Michael Binzer taama KNR.gl-mut nassuiaavoq.
- Aningaasat sinaakkusiussat 2005-ip kingorna allanngortinneqarsimanngillat, aningaasartuutillu ineriartornerat qiviaraanni allaqqussinnaanngilaq ukiut arfineq pingasut matuma siorna sullissinerup pitsaaqataanut aningaasat naammakkunnaarsimasut, Michael Binzer oqarpoq.
Tassalu Bell 212-ip silamut malussarinnera kinguaattoornernut taamaatitsinernullu pissutaaqataalluinnarpoq. Kujataani ukiortaap kingorna nuissat pukkissimaqaat masannartuliorluni anorlerlunilu taamalu kinguaattoornerit taamaatitsinerillu ikigisassaanatik.
Qeqertarsuup tunuani Bell 212 teknikkikkut ajornartorsiuteqarsimavoq kinguaattoornernut taamaatitsinernullu pissutaasumik. Qulimiguulik mikisoq AS350 Aasiannut inissinneqarpoq Aasiaat eqqaani nunaqarfinnut timmisartuussinermi atorneqassalluni.
- Soorunami kissaatigigaluarparput sullissinissamik isumaqatigiissutip atulernerata pitsaanerusumik pisimanissaa, aamma ajuusaarutigaarput ilaasut eqqugaammata taakkunanilu unnuinermut nerisaqarnermullu akiliunneqartarput taama pineqarnisssamut pisinnaatitaaffitsik naapertorlugu, Michael Binzer oqarpoq.
