Qulaarpaa Aningaasat nunatta karsianit aniaannalersut
Iluarsartuusseqqittoqassaaq aningaasaqarniarnerlu siumut-saatsinneqassalluni. Aningaasaqarnermut naalakkersuisoq Andreas Uldum nunatta aningaasaqarnera akisussaaffigileramiuk taama imminut anguniagassissimavoq.
Aningaasaqarneq pitsaanngitsumik aqunneqarsimasoq akisussaaffigilerpaa. Aningaasaqarnermi ukiup naanerani amigartooruteqarfiussanersoq sinneqartooruteqarfiussanersorluunniit ukiuni kingullerni nalunartuarsimavoq.
Sinneqartoorutit amigartoorutinngortinneqartut
Aningaasanut inatsit 2013-imi amigartooruteqarfiusussatut missingersuutigineqaraluartoq sinneqartooruteqarfiuvoq. 2014-imi 21 millionit koruuninik sinneqartooruteqarnissaq missingersuutigineqarpoq, ilassutitulli aningaasaliisoqareerneratigut 127 millionit koruuninik amigartooruteqarfiulluni. Maannakkorpiarlu suli annertunerusumik amigartooruteqarfiusussatut isikkoqarpoq.
Aningaasaqarnermut naalakkersuisoqarfiup naatsorsuineri malillugit, 2014-imut naatsorsuutit 225 millionit 240 millionit koruunillu akornanni amigartooruteqarfiussapput.
Isertitat ikiliartortut
Tupamut imigassamullu akitsuutinit isertitat avaleraasartoorniarnermillu isertitat ikinnerulersimanerat, inissianik tunisinissap iluatsinngitsoornera isertitallu nalinginnaasumik ikilisimanerat amigartooruteqarnermut pissutaapput.
Aningaasaqarnermut naalakkersuisup Andreas Uldumip ukioq manna 76 millionit koruuninik amigartooruteqarnissaq missingersuutigaa.
Iluarsartuusseqqinnissat aallartisarneqangajalerput
Naalakkersuisutulli akisussaasuunermini iluarsartuusseqqinnerit sivisuumik utaqqineqarsimasut piviusunngortinneqarnissaat siunniussimavaa, tamannalu Kalaallit Nunaanni aningaasaqarnermut siunnersuisooqatigiit kaammattuutaannut naapertuulluinnarpoq.
- Suut anguniagaanersut matumani pingaaruteqarluinnarput. Pingaarnertut sukannersumik aningaasaqarnikkut aqutsinissaq, aappaattullu iluarsartuusseqqittoqarneratigut sipaarniartoqarneratigullu aatsaat oqimaaqatigiissitsisoqarsinnaanera, aningaasaqarnermut siunnersuisooqatigiit siulittaasuat, Torben M. Andersen, taama oqarpoq.
Siunertaaginnarallarput
Iluarsartuusseqqinnissalli maannamut siunertaaginnarallarput.
- Suli tigussaasunngortinneqanngillat, tamatumalu isumagineqarnissaa soorunami pingaaruteqarluinnarpoq. Aningaasaqarnerulli oqimaaqatigiissinniarnissaanut tamakku inissinneqartariaqarnerisa pingaaruteqassusaat matumani atuarneqarsinnaalluarpoq, Torben M. Andersen oqarpoq.
Andreas Uldumimut 2015-imi isertitat 6,5 milliardit koruuninik amerlatigisut atugassiissutaassapput, taakkunannga 4 milliardit koruunit missaat Danmarkit EU-millu ikiorsiissutitut pissarsiarineqassallutik.
