Aningaasat isaapput

Katersuiniarnermi angusarisat Aasianni Neriuffiup siulittaasuata  qujamasuutigai.

- Ulloq taanna sila ajoraluartoq katersineq ingerlalluarpoq, Dorthe Olsen Aasianni Neriuffiup siulittaasua oqarpoq.

Aningaasallu matumiit matumut katersorneqartut 77.145 koruuniupput.

Aasiaat 3.100-ut missaanni inoqarpoq. Aningaasallu katersorneqartut inuttaasunut tamanut agguaqatigiisikkaanni inuup ataatsip tunniussimasaa 20 koruunimit minnerunngilaq.

- Agguaqatigiissikkaanni meeraaqqaniik utoqqarnut aasiammiut 24,45 koruuninik tunisipput, Dorthe Olsen oqarpoq.

Matumiit matumut aningaasanik katersuiniarnerup saniatigut Aasianni innuttaasut ilaat nammineq piumassutsiminnik neriassanik kissartunik kaaginillu tuniniagassanik tunissuteqarput.

- Taakkulu igaat kaagillu tunissutigineqartut piumaneqartorujussuupput.Qujanartumik taakkua aamma tapertaalluarput, Dorthe Olsen ikiuussimasunut tunissuteqartunullu qujamasoqisoq oqarpoq.

Neriuffiup nuna tamakkerlugu katersuiniarnerani aningaasaat  katersarineqartut katillugit qanoq amerlatiginersut Neriuffiup kattuffianit oqaatigineqarsinnaanngikkalarpoq.

Maannamulli Neriuffiup sinerissami immikkoortortaqarfianit aningaasat 321.737 korunit nassiunneqarsimapput.

Nuummi katersuiniarnermi aningaasat 200.000 korunit missaat katersorneqarsimapput.

Nunalu tamakkerlugu katersuiniarnermi aningaasat qanoq amerlatigisut katersorneqarsimanersut qammaatip ataatsip ingerlanerani oqaatigineqarsinnaanngorumaartoq, Neriuffiup kattuffiani allammiup Juliane Dalagerip naatsorsuutigaa.