Aningaasartuuterpassuaqarnissaq Aqqaluap naatsorsuutigigaa

- Taanna aaqqinneqassappat aningaasarparujussuarnik malitseqarnissaa ilimanarpoq, Aqqaluaq B. Egede oqarpoq.

Kiffartuussinissamillu isumaqatigiissutit naammaginartuunnginnerannut Aqqaluaq B Egede attaveqaqatigiinnermut naalakkersuisuusimasoq pisuutippaa.

- Kiffartuussinissamik isumaqatigiissutit Naalakkersuisuninngaanniit isasoorunneqarnikuupput. Taamaammat tassani immikkut aningaasaliissutinik amerlasoorujussuarnik malitseqarnissaanik naatsorsuutigivara, Aqqaluaq B. Egede taama oqarpoq.

Knud Kristiansen attaveqaqatigiinnermut naalakkersuisutut kiffartuussinissamik isumaqatigiissutinik suliaqartuuvoq.

Isumaqatigiissutilli suliarineqarneranni Aqqaluaq B. Egede aningaasaqarnermut ataatsimiititaliami siulittaasup tulliatut inissisimavoq, ataatsimiititaliallu kiffartuussinissamik isumaqatigiissutinik  suliaqarnerani, taanna aningaasaliissutaasussatut siunniunneqartunut isornartorsiuinngilaq.

Aamma atuaruk Akuersaarneqarsinnaanngilaq tukallunilu

Naalakkersuisup aningaasaliissutissanut sinaakkutissatut siunnersuutaa ataatsimiititaliamut apuunneqarpoq. Tamatuma kingorna sivisuumik Naalakkersuisuq ataatsimiititaliarlu allaffigeqattaapput, taamanilu aningaasaliissutigineqartussatut aalajangiunneqartut malitsigisaanik sullissinerup ajorseriarnissaa Knud Kristiansenip erseqqissaatigaa.

Naalakkersuisoq tamatuma kingorna aningaangaasaliissutissatut sinaakkusiussat iluanni suleqqinnissamut piginnaatinneqarpoq.

Aamma atuaruk Kiffartuussinerup ajorseriarnissaanut IA akuerseqataavoq

Aamma atuaruk KNR IA-p isornartorsiutaanut akivoq

Sulialli inernera Aqqaluaq B. Egedep naammaginngilluinnarpaa. Aningaasaqarnermullu naalakkersuisutut maanna atuuffeqalerpoq, aningaasanillu ujaarlernissaq akisussaaffigilerlugu.

Aningaasanut inatsisissatut siunnersuut allannguuteqassanersoq aperineqarami ima akivoq.

- Allannguuteqassaaq. Aamma uani nutaamik isummerfissamik takkuttoqarnissaa naatsorsuutigineqassaaq, aningaasaqarnermut naalakkersuisoq, Aqqaluaq B. Egede taama oqarpoq, ilanngullugulu oqarluni kiffartuussinissamik isumaqatigiissutinut aningaasaliissutissat aningaasanit nutaanit akilerneqarsinnaanngimmata aningaasanut inatsit allannguuteqassasoq, tamatumalu naalakkersuisooqatigiit isumaqatigiissutaat aallaaviussalluni.