KANUKOKA-p siulittaasua Akuersaarneqarsinnaanngilaq tukallunilu
- Akuersaarneqarsinnaanngilluinnarpoq tukallunilu, KANUKOKA-mi siulittaasoq Simon Simonsen, assartuussinermi kiffartuussinissamik isumaqatigiissutit pillugit taama oqarpoq.
KANUKOKA-mi ilaasortat isumaqatigiissut, tassalu Kommune Kujalleq, Qaasuisup Kommunia Qeqqatalu Kommunia, kiffartuussinissamik isumaqatigiissutit utertinneqarnissaannik piumasaqaateqarniarlutik marlunngormat ataatsimiinnerminni isumaqatigiissutigaat.
Kiffartuussinissamik isumaqatigiissutinut tunngatillugu pingaartumik Qeqertarsuup tunuani aamma Kujaatani ingerlatsinissaq isorineqartupilussuuvoq.
Simon Simonsen KANUKOKA-mi siulittaasuunermi saniatigut aamma Kommune Kujallermi borgmesterimut tullersortaavoq. Angallassinerup nutaamik aaqqissugaanerani imaatigut angallassinissaq ernumanartoqartippaa, piffissap ilarujussuani sikoqartarnerata angallannermut akornutaanissaa pissutigalugu.
Taamaattoqartillugu imaatigut angalasoqarsinnaanngilaq, Simon Simonsen oqarpoq.
Aamma atuaruk VIDEO KANUKOKAp angallannermut kiffartuussinissamut isumaqatigiissut tunuarteqquniarpaa
Angallatit Disko Linep qulimiguulinnut taarsiullugit akikinnerusumik aaqqiissutissarigaluarpaat, aamma Disko Linep qulimiguullit akisunerusut atornagit imaatigut amerlanerusut angalanissaat siunnerfigisimarpasippaa.
Disko Linep nittartagaa naapertorlugu, Qaqortumit Narsarsuarmut januaarip aallaqqaataanit 550 koruuneerluni imaatigut angalasoqarsinnaavoq - billetsi taanna toqqaraanni angalaneq akunnernik sisamanik minutsinillu 40-nik sivisussuseqassaaq. Innuttaasulli billetsi akisunerullaartoq aamma pisiarisinnaavaat, taanna 750 koruuneqarpoq, angalanerlu akunnermik ataatsimik minutsinillu 45-nik sivisussuseqassaaq.
Air Greenlandip qulimiguuliutaanik angalaneq ullumikkut 1.061 koruuneqarpoq - angalanerlu taanna angallassineq Disko Linemit januaarip aallaqqaataa aallarnerfigalugu ingerlanneqalerpat 1.400 koruuneqalissaaq.
Disko Linelli angallatit angalasinnaanngikkaangata qulimiguulimmik angallassinissamut naammassisinnaassuseqassanersoq Simon Simonsenip apeqquserpaa.
- Januaarip aallaaqqaataata kingorna Bell 212 ataasiinnaq Kujataani angalalissaaq, aappaalu tassaavoq qulimiguulik A350, taannalu tallimanik ilaasoqarsinnaavoq nassatanullu inissiisarfeqaraniluunniit, Simon Simonsen taama oqarpoq.
Disko Linemi pisortap Frederik Sandgreenip KNR-imut oqaatigaa angalanissamut pilersaarutit Disko Linep nittartagaaniittut ilaat suli nutartigassaasut, tamatumali saniatigut Disko Linep kiffartuussinissamillu isumaqatigiissutit isornartorsiorneqarnerat Frederik Sandgreenip oqaaseqarfigiumanngilai.
