Aningaasarsiutigalugu kapisilinniarneq ukiuni 12-ini inerteqqutaassasoq
![](/sites/default/files/styles/image_934x467/public/article_images/laks_kapisilik_foto_ingrid_taylar_flickr.jpg?itok=PgtvkGTA)
Kapisillit pillugit kattuffiit Islandimi ataatsiminnerannut atatillugu KNAPK-p isumaqatigiissut maajip ulluisa 24-anni atsiorpaa. Qaammatit aqqaneq marluk isumaqatiginniartoqareersorlu atsioqatigiittoqarpoq.
Isumaqatigiissut ukiuni arlalinnii atuutereerpoq, kapisilinnillu aningaasarsiutigalugu nunatsinni aalisakkerivinnut tunisisoqartannginnissaa pineqarluni.
Kapisillit nammineq nerisassatut aamma kalaalimineerniarfinni tuniniagassatut aalisarneqarsinnaapput.
AAMMA ATUARUK Kapisillit Norgmeersut taamaammat tuniniarpavut
KNAPK-mi aningaasaqarnermut siunnersorti Tønnes Kaka Berthelsen KNR-imut oqaluttuarpoq isumaqatigiissutigineqartoq KNAPK-mut ukiumut 1,9 millionit koruuninik isertitsissutigineqartartoq, aningaasallu taakku aningaasarsiutigalugu kapisilinniaqqusaannginnermut taarsiullugit pissarsiarineqarput.
- Aningaasat taakku aalisarnermut tunngasunut aningaasaliinissamut qinnuteqarfigineqarsinnaapput, Tønne Kaka Berthelsen oqarpoq.
Isumaqatigiissut ukiunut aqqaneq marlunnut atuuttoq ukiut pingasut ingerlareernerini atorunnaarsinneqarsinnaavoq, isumaqatigiissullu nutaaq aatsaat atuutilersinneqarsinnaavoq Naalakkersuisunit akuersissutigineqarneratigut.
AAMMA ATUARUK Kapisilinniarneq aggustip 15-iani aallartissaaq