Royal Greenland: Kapisillit Norgmeersut taamaammat tuniniarpavut
Pisiniartartut arlallit kapisillit nunatsinneersuunngitsut tuniniarneqarneri tupigusuutigaat sunalu pissutaanersoq Royal Greenlandip Facebookkikkut qupperneratigut apeqqutigalugu.
Royal Greenland Namminersorlutik Oqartussat kapisilinniarnermut nalunaarutaannut innersuussivoq. Nalunaarut naapertorlugu nunatsinni kalaalimineerniarfinnut, pisortat suliffeqarfiutaannut neriniartarfinnullu taamaallaat tunisassanik kapisilinniartoqarsinnaavoq.
Royal Greenlandilu kapisilinnik nunatsinneersunik tunitsivigineqarnissaminut tuniniaanissaminullu akuersissuteqanngilaq.
Kapisilittassiissutit ukiumut 45 tonsiusarput, taakkulu sunngiffimmi inuussutissarsiutigalugulu aalisartunut kapisilittaminnillu soorlu nunatsinni niuertarfeqarfinnut mamartuliaarniarfiutiminni tuniniaaqqittartunut toqqaannartumik tuniniaasinnaasunut agguataarneqartarput.
Tamatuma saniatigut Royal Greenland nassuiaavoq, pisariillisaajumalluni kapisillit Norgeminngaanneersut nunatsinni tunisassiat puuisa assingi atorlugit poortorneqartartut. Kapisillillu tuniniarneqartut Norgemi tukertitsivimmeersuusut puuisa allagartaanni takuneqarsinnaavoq, tassalu tamanna pisiniartartunit qisuariarfigineqarpoq.
