Aningaasarsiornermut siunnersuisut: Aningaasiviup imai paarilluagassaapput

Nunatsinni utoqqaat amerlanerulernerisa kingunerisinnaavaa Nunatta karsiata imaarukkaluttuinnarnera, taamaattumik Oqartussat aningaasanik atuilluarnerusariaqarpugut.

Taamaattorli suna tamarmi taartuinnaanngitsoq, Aningaasaqarnermut Siunnersuisoqatigiit siulittaasuata, Torben M. Andersenip saqqummeereernermini oqaatigaa, Oqartussat aningaasanik aqutsinerat ajoquteqanngimmat.

- Namminersorlutik Oqartussat aningaasaqarnerata aqunneqarnera ajoquteqanngilaq. Akiitsut annertunngillat, ilanngaatissallu ilanngaatigereertlugit landskarsi sinneqartooruteqalaarluni, Aningaasaqarnermut Siunnersuisoqatigiit siulittaasuat, ilisimatooq Torben M. Andersen taama oqarpoq.

Akit aningaasarsiornikkullu pissutsit Nunatsinni allanngorarnerat aamma Namminersorlutik Oqartussat aningaasaqarnerat pillugu siunnersuisoqatigiit ukiumoortumik nalunaarusiartik kingulleq ullumi saqqummiuppaat.

Nunatta aningaasaqarnerata aqunneqarnera pitsaanerareerlugu, Torben M. Andersenip mianerisassat eqqartorpai.

- Kalaallit Nunaanni utoqqaat amerliartorput. Tamannalu inuuneqqortusinerup kingunerimmagu nuannaarutigisariaqarparput. Taamaattorli utoqqaat amerlanerit kiffartuunneqartussanngorput aamma soraarnerussutisiaqartussat amerlanerulerlutik. Utoqqaallu angerlasimaffiini sullissineq annertusisussaassalluni, Torben M. Andersen oqarpoq.

Utoqqaat amerlanerulernerisa ilutigisaanik, ineriartornerup nassatai politikerinit mianersorfigineqanngippata akiitsut isertitanit amerlanerulersinnaannerat, Torben M. Andersenip oqaatigaa.

- Aningaasartuutit isertitanit amerlaneruleriaannaapput. Tamanna arriitsunnguamik pissaaq malunnarlunili. Tamannalu eqqumaffigineqanngippat amigartoorutit annertoorujussuanngussapput, tamatumalu nassatarissinnaavaa akiitsut amerliartulerneri. Akiitsoqarpallaalernerullu kingunerisarpaa aningaasanik nunanit allanit attartorsinnaanerup killeqalernera, Torben M. Andersen oqarpoq.

Torben M. Andersenip ilanngullugu oqaatigaa, taamatut nalaataqassanngikkutta, Nunatsinni politikerit siunissaq pillugu eqqummaarinnerusariaqartut.

Mianersoqqussutillu ilaatigut makkuusut Torben M. Andersenip oqaatigai.

- Ukioq manna aatsitassarsiornermik misissuisoqanngivissornerata kingorna aamma aalisakkanit isertitat ukioq manna ikinnerunerisa kingorna, ukioq 2012 Kalaallit Nunaat aningaasanik isertitaqanngilaq. Aamma ukioq 2013 taama isikkoqartussaassasoq ilimagineqarpoq, Torben M. Andersen oqarpoq.

- Aningaasaqarnerup nukilaattuunerata tamanna pilersissavaa, aalisakkallu pisarineqartartut amerlassusaat qaffariassanngitsoq ilimanarmat tamanna isumalluutigineqarsinnaanani. Aalisakkat akii piffissami kingullerni qaffariarsimagaluarput, ilimanarporli taakku akii siunissami appariartulerumaartut. Taamaattumik oqartoqarsinnaavoq Kalaallit Nunaanni aalisarneq aningaasaqarnermut iluaqutaavallaarunnaasimasoq, Aningaasaqarnermut Siunnersuisoqatigiit saiulittaasuat, Torben M. Andersen taama oqarpoq.