Aningaasaqarnermut Siunnersuisoqatigiit nalunaarusiartik ullumi saqqummiussavaat
Aningaasaqarnermut Siunnersuisoqatigiit nunatta aningaasaqarnerani pissutsit pillugit nalunaarusiartik ullumi saqqummiussavaat.
Tamanna tusagassiortunik ualeru sisamanut katersortitsinermi pissaaq.
Siunnersuisoqatigiit ilaatigut aningaasaqarnermi unammillernartut qanorlu ineriartortoqarsinnaanersoq nalunaarusiarisarpaat.
Siunnersuisoqatigiit nunatta aningaasaqarneranut politikerinit atorneqarsinnaasunik pituttorsimanngitsumik misissueqqissaartarput, Naalakkersuisunit 2009-mi pilersinneqarlutik.
Nalunaarusiamik nalinginnaasumik ukiumut nalunaarusiortarput.
AAMMA ATUARUK Siunnersuisoqatigiit: Nunarput ajornartorsiorfimmi naatsorsuutigisamit ajunnginnerusumik ingerlavoq
Coronavirusili aamma siunnersuisoqatigiinnut ulapititsimmat, nalunaarusiamik virusip aningaasaqarnermut kingunerisaanut tunngasorujussuarmik upernaaq saqqummersitsipput.
Virusip kingunerisai ernumassutigineqartutut ajortiginngitsut tassani allapput.
Kisianni aamma nunatta karsiata isertitaanut aningaasartuutaanullu sunniuteqartartunik arlalippassuarnik nalinginnaasumik sammisaqartarput.
Taakku nunatsinni aningaasaqarnermut politikkimiit nunarsuarmi tamarmi pissutsit ineriartornerannut tunngassuteqartarput.
AAMMA ATUARUK Naalagaaffimmit tapiissutit unitsissappata iliuuserineqartut oqaatsinit amerlanerusariaqarput
Nunatta aningaasartuutaasa isertitanit amerlanerujussuulernissaannut ilimagisamut innersuussillutik politikerit aaqqissuusseqqinnissaat pisariaqartoq siornatigut oqaatigisaqattaartareerpaat.
Nunatta innuttaasuisa agguaqatigiissillugu ukioqqortunerulernissaata, taamaalillunilu isumagineqartussat amerlaneruliitigalutik isumaginnittussat ikilinissaata ilimagineqarnera aaqqissuusseqqeqqusinermut pissutaasunut ilaavoq.