Aningaasaqarnermut ataatsimititaliap Naalakkersuisut utaqqivai
Aningaasanut inatsisisissap ullumi aappassaaneerneqarneranut atatillugu Aningaasaqarnermut Ataatsimiititaliaq ima allappoq: "Naalakkersuisut 2010-mi aningaasanut inatsisissatut siunnersuutaat tapersernerlugu tapersinnginnerluguluunniit Aningaasaqarnermut Ataatsimiititaliap maanna oqaatigisinnaanngilaa".
Aningaasanut inatsisissaq pingajussaaneerlugu Inatsisartuni suliarineqalerpat aatsaat inaarutaasumik inassuteqassallutik Ataatsimiititaliamiit allapput.
Apeqqutit arlallit Naalakkersuisunut ilaasortanit assigiinngitsunit akineqareerpata itisilerneqareerpataluunnit aatsaat inassuteqassallutik neriorsuipput.
Aningaasaqarnermut atatsimiititaliami ilaasortat ulapissimaqaat. Aningaasanut inatsisissaq siullermeerlugu suliarineqarmalli allanguutissatut siunnersuutit 206-it suliarisimavaat.
Allannguutissat ilaatigut kinguneraat, Nunatta Karsiata amigartoorutissai 29 millioni koruuninik ilammata 255 millioni koruuninngussallutik.
Kisianni Nunatta Karsia amingartuussanngitsoq, Naalakkersuisut suli siunniuppaat. Taamaammat aningaasaqarnermut naalakkersuisoq Palle Christiansen, sipaarfiusinnasunik isertitallu amerlissutissaanik ujarlissaaq. Tamakkualu aningaasanut inatsisissaq novembarip 27-ani pingajussaaneerneqarpat saqqummiutissavai.
Kisianni aningaasanut inatsisissap Inatsisartunit ataatsimoorfiunissaa ilimananngilaq, illuatungiliuttut piumasaqaaterpassuaqarmata, partiinit naalakkersuisuutitaqartunit akuerineqarsinnaanngitsunik.
