Aningaasaqarnermut ataatsimiititaliaq siulittaasortaassaaq
Inuit Ataqatigiinneersoq, Naaja Nathanielsen, aningaasaqarnermut ataatsimiititaliami siulittaasuusimasoq, ataatsimiititaliami pissaaneqaqisumi siulittaasuujunnaarpoq. Parteeqataa, Aqqaluaq B. Egede, aamma ataatsimiititaliami siulittaasup tullia, Niels Thomsen, Demokraatineersoq, ataatsimiititaliamiikkunnaarputtaaq.
Kukkunersiuinermut ataatsimiititaliami annertuumik aamma allannguisoqassaaq. Inatsisartut matoqqasumik ippassaq ataatsimiimmata tamanna aalajangerneqartoq, Sermitsiaq AG-mi allaaserineqarpoq.
Aningaasaqarnermut ataatsimiititaliami ilaasortanngorput Olga Poulsen Berthelsen, aamma Juliane Henningsen, Inuit Ataqatigiinneersut, taavalu Anda Uldum, Demokraatineersoq. Siumumeersut Per Berthelsen aamma Finn Karlsen ataatsimiititaliami ilaasortaaginnarput.
Naaja Nathanielsen, Aningaasaqarnermut ataatsimiititaliami siulittaasuujunnaartoq, kukkunersiuinermut ataatsimiititaliami siulittaasunngussasoq Sermitsiaq/AG-mi allaaserineqarpoq. Ataatsimiititaliami tassani ilaasortat tassaapput, Demokraatineersoq Justus Hansen, Atassummeersoq Knud Kristiansen, taavalu Siumumeersut Kristian Jerimiassen aamma Karl Lyberth.
Naaja Nathanielsenip taarserneqarnera atorfimmik appariartitsinerunersoq - imaluunniit soraarsitsinerunersoq - eqqarsaatersuutigineqarpoq. Taamatut allanngortitsineq Siumumit Atassummillu qisuariarfigineqareerpoq.
Siumumeersoq Per Berthelsen Sermitsiaq/AG-mut oqarpoq pisoq "pillaanertut" nammineq isigigini.
Atassummeersoq, Steen Lynge, tusagassiutinut allakkamini oqarpoq, Aningaasaqarnermut ataatsimiititaliami pissaaneqaqisumi ilaasortat taakku pingasut - tassa Naaja Nathanielsenip, Niels Thomsenip aamma Aqqaluaq B. Egede-p soraarsitaanerisa paasinarsisikkaat, partiit siulittaasui qitiutinneqarpallaartut.
- Suliassatik suliarisimagamikkik ilaasortat taakku pingasut soraarsitaapput. Ulloq demokratiimut alianartuuvoq, Steen Lynge oqarpoq.
