Aningaasaqarnermut ataatsimiititaliap Vittus Qujaukitsoq isumasioqatigiinnissamut aggersaraa
Nunatsinni tamat oqartussaaqataaneranni Inatsisartuni ammasumik aatsaat siullerpaamik ataasinngornermi isumaqatigiittoqassaaq.
Aningaasaqarnermut Akileraartarnermullu ataatsimiititaliaq isumasioqatigiinnissamut aggersaasuuvoq, isumasioqatigiinnissamut aningaasaqarnermut naalakkersuisoq, Vittus Qujaukitsoq, pingaarnertut aggersarneqarpoq.
Taassuma ataatsimiititaliamit soraarnerussutisiaqalernissamut aaqqissuussinermut peqataasussaatitaanermut tunngatillugu apeqqutit akissuteqarfigissavai. Suliaq taanna innuttaasunut 6.628-nut, soraarnerussutisiaqalernissamut peqataasussaatitaanermi naammattunik akiliuteqarsimanngitsunut tunngavoq. Taamaammat Akileraartarnermut Aqutsisoqarfiup aningaasat amigaataasut akilertinniarlugit aallartippai.
Tassa imaappoq innuttaasut 6.628-t inatsit malillugu soraarnerusutisiassanut nammineq katersisussaatitaanermut akiliiniagassammata taakku ukioq manna akileraaruteqarnerusariaqarput.
Innuttaasut qanoq aningaasarsiaqartiginerat apeqqutaalluni 2 procentip 6 procentillu akornanni akileraarnerutinneqassapput.
AAMMA ATUARUK 6000-it soraarnerussutisiassanut akiliinerussasut
Soraarnerussutisiassat pillugit suliaq illuatungiliuuttut sapaatip-akunnerata siuliani naammagilerpaat. Aningaasaqarnermut Akileraartarnermut ataatsimiititaliap Vittus Qujaukitsoq isumasioqatigiinnissamut maanna aggersarpaat. Tamanna januaarip ulluisa 27-anni ualikkut nalunaaqutaq pingasunut tamanna pissaaq. Ataatsimiititaliallu Naalakkersuisut soraarnerussutisiaqalernissamut aaqqissuussinermut peqataasussaatitaanermut akiliuteqartitsinissamut allaffissornermi maannamut misilittagaannik apeqquteqarfigissavaat.
Ataatsimiititaliaq isumasioqatigiinnissamut aggersaanissamut isumaqatigiittoq
Inatsisartumi ammasumik isumasioqatigiittoqarnissasoq
- Isumasioqatigiinnermi amerlanerpaamik 15-it tusarnaartuusinnaasut.
- Tusarnaarnissamut inissat Inatsisartoqarfimmut mailikkut inatsisartut@inatsisartut.gl-imut oqarasuaammulluunniit 34 61 25-mut attaveqartunut siullernut tunniunneqassapput.
- Isumasioqatigiissitsisoqarnerani malinnaanissamut inissamik inniminneereernissaq pisariaqartoq, Inatsisartut paasissutissiipput.
- Tusarnaartussat Inatsisartut saaffiginnittarfiannut isumaqasioqatigiinnissamut minutsit 15-it sioqqullugit takkutissapput.
Hermann Berthelsen Aningaasaqarnermut Akileraartarnermullu Ataatsimiititaliami siulittaasuuvoq. Taassuma Naalakkersuisup isumasioqatigiinnissamut aggersarneqarnissaa ataatsimiititaliami isumaqatigiiffiunerarpaa.
Isumasioqatigiissitsinerlu siullerpaamik ammasuutinneqassaaq.
Isumasioqatigiissitsineq kalaallisut danskisullu malinnaaffigineqarsinnaassaaq.
Kisianni sooruna isumasioqatigiissitsineq tamanut ammasuussasoq?
- Suliaq inuppassuarnut eqquimmat taama aalajangerpugut, Hermann Berthelsen oqarpoq.
AAMMA ATUARUK Soraarnerussutisiassanik katersinngitsoorneq: Allakkat tigusisussanut apuutinngitsut
Vittus Qujaukitsup innuttaasut SIK-llu naalakkersuisoq soraarnerussutisiaqarnissamut aaqqissuussinermut peqataasussaatitaanermut malittarisassat nutaat pillugit paasissutissiinerlussimanerarlugu isornartorsiuinerat paasisinnaanerarpaa.
- Naammassimanersoq, naamik naammassimanngilaq.
Soraarnerusutisiaqalernissamut aaqqissuussamut peqataasussaatitaaneq januaarip aallaqqaataat, 2018-imi atuutilerpoq, Namminersorlutik Oqartussalli Akileraartarnermut Aqutsisoqarfillu akileraarutip procentiata qaffanneratigut soraarnerussutisiassanut aatsaat ukioq manna akiliisitsipput.